Razychodžańni ŭ supravadžalnych dakumientach małočnaj pradukcyi, vyrablenaj mahiloŭskim AAT «Babulin hlečyk», stali pryčynaj niadopusku jaje na terytoryju Rasii.
Jak paviedamiła siońnia ŭpraŭleńnie Rasspažyŭnahladu pa Smalenskaj i Branskaj abłaściach Rasii, 27 žniŭnia ŭ punkcie papiaredniaha paviedamleńnia «Čyrvonaja Horka» byŭ zabaronieny ŭvoz u Rasijskuju Fiederacyju bolš za tonu małočnaj pradukcyi, vyrablenaj kirujučaj kampanijaj chołdynhu «Mahiloŭskaja małočnaja kampanija «Babulin hlečyk».
«Pry praviadzieńni vieterynarnaha kantrolu ŭpraŭleńniem Raśsielhasnahladu pa Branskaj i Smalenskaj abłaściach vyjaŭlena, što faktyčnaja data vyrabu praduktu nie adpaviadaje datam, nazvanym u vieterynarnych siertyfikatach. Z čaho vynikaje, što hruz ruchaŭsia biez dakumienta, što harantuje biaśpieku małočnaj pradukcyi», — adznačajecca na sajcie rasijskaha viedamstva.
Tam ža adznačajecca, što ŭ apošni čas takoha rodu parušeńni stali nasić sistemny charaktar. «Upraŭleńnie Raśsielhasnahladu miarkuje, što vieterynarnaj słužbie Respubliki Biełaruś varta na heta źviarnuć asablivuju ŭvahu i pryniać miery dla vyklučeńnia padobnych parušeńniaŭ», — havorycca ŭ paviedamleńni.
Jak paviedamili ŭ adździele źniešnieekanamičnaj dziejnaści mahiloŭskaha małočnaha pradpryjemstva, nie dapuščanuju da realizacyi ŭ Rasii pradukcyju viezła nie «Babulina krynka», a jaje kontrahient — kampanija «Jeŭrahandal». «U ich jość pradstaŭnictva ŭ Rasijskaj Fiederacyi, i jany zajmalisia sami pieramiaščeńniem za miažu Respubliki Biełaruś našaj pradukcyi. Ale ich vieterynarny doktar dapuściŭ pamyłku ŭ afarmleńni supravadžalnaha pakieta dakumientaŭ. U vieterynarnym paśviedčańni jon niapravilna paznačyŭ daty vytvorčaści małaka», — skazaŭ pradstaŭnik pradpryjemstva, adznačyŭšy, što vieterynarny doktar pierabłytaŭ miesiac u dacie vyrabu małaka — «pa fakcie tam byŭ žnivień, jon ža pastaviŭ červień».
Pa słovach rabotnika «Babulinaha hlečyka», nie dapuščanaja pradukcyja išła pad handlovaj markaj «Stary Miensk», jakaja naležyć «Jeŭrahandlu».
