Śledčyja vyśviatlajuć akaličnaści śmiarotnaha ranieńnia palaŭničaha ŭ Pružanskim rajonie.
Jak paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, 52-hadovamu mužčynu było pryčyniena ahniastrelnaje ranieńnie ŭ vobłaść hrudnoj kletki 26 žniŭnia pryblizna kala vaśmi viečara na kukuruznym poli pablizu vioski Baraviki. Ad atrymanych cialesnych paškodžańniaŭ paciarpieły pamior na miescy.
Mužčyna razam sa svaim 46-hadovym siabram niezakonna palavaŭ na dzika. Pavodle papiarednich dadzienych, apošni vystraliŭ ź niezarehistravanaj hładkastvolnaj strelby «TOZ» 16-ha kalibru ŭ bok mierkavanaha miescaznachodžańnia zdabyčy, dzie brachali sabaki, nie pierakanaŭšysia ŭ adsutnaści ŭ zonie paražeńnia ludziej, i śmiarotna paraniŭ siabra.
Ab tym, što zdaryłasia, strałok sam paviedamiŭ u pravaachoŭnyja orhany.
Pružanskim rajonnym adździełam Śledčaha kamiteta raspačata sprava pa č. 1 art. 144 KK (pryčynieńnie śmierci pa nieaściarožnaści).
Padazravany zatrymany, ź im pracujuć śledčyja. Jon žychar Pružanaŭ, pracuje valščykam lesu ŭ adnym ź laśnictvaŭ rehijonu, raniej nie sudzimy. Padčas palavańnia jon byŭ ćviarozy.
Dla vyśviatleńnia ŭsich akaličnaściaŭ taho, što adbyłosia, pryznačany šerah ekśpiertnych daśledavańniaŭ.
Zahinuły žyŭ u vioscy Rudniki Pružanskaha rajona, pracavaŭ inžynieram na adnym ź miascovych sielhaspradpryjemstvaŭ.