Fota karystalnicy Fejsbuka Kaciaryny Karalovaj
Internet ablataje fota babuli ź cialežkaj, jakuju «pakujuć» u milicejski ŭazik. Kiraŭnik pres-słužby minskaj milicyi Alaksandr Łastoŭski tłumačyć, što babulu «złavili» na kradziažy ŭ kramie «Rubloŭski», što na praśpiekcie Pieramožcaŭ u Minsku, supracoŭniki milicyi pavodzili siabie vielmi karektna:
«… skłali akt kanfiskacyi tavaru. Babulu treba było dastavić u Centralnaje RUUS dla razboru. Ale zrabić heta akazałasia składana: patrulny aŭtamabil apynuŭsia zanadta vysokim dla babuli, jakaja pierasoŭvałasia ź vialikaj ciažkaściu. Tamu situacyja dastaŭleńnia babuli ŭ RUUS ciahnułasia davoli doŭha. Vyklikali navat «hazielku» — taksama nie atrymałasia. U vyniku babula była dastaŭlenaja ŭ Centralnaje RUUS na patrulnym aŭtamabili».
Babulu zavuć Alina Viktaraŭna, joj 76 hadoŭ, pražyvaje jana ŭ Stabcoŭskim rajonie. U Minsk pryjazdžaje prasić miłaścinu la Pietrapaŭłaŭskaj carkvy, tamu i ŭ «Rubloŭskim» — častaja hościa. Trojčy traplajecca tut na drobnych kradziažach. Ale dahetul administracyja kramy jaje škaduje. Prosta prosić viarnuć tavar na miesca. A hetym razam ciarpieńnie, vidać, zakančvajecca — babulu vyrašajuć papužać milicyjaj. Kažuć, z-za niekalkich bułačak. Chacia pratakoł na jaje ŭ vyniku nie składajuć.
«U lubym vypadku, pry razhladzie spravy ab administracyjnym spahnańni ŭličvajucca asoby i inšyja čałaviečyja charaktarystyki», — havoryć Alaksandr Łastoŭski i raspaviadaje, što adzin z karystalnikaŭ Fejsbuka prapanavaŭ apłacić babulin štraf, adnak, u vyniku heta rabić nie daviadziecca.
Pa słovach supracoŭnicy adnoj z praduktovych kramaŭ u centry Minska, padobnyja vypadki zdarajucca štodnia:
«Na vyhlad dastatkova prystojnyja piensijaniery — z kijočkami i ŭ akularach. Nikoli nie padumaješ, što hety čałaviek moža niešta pakłaści sabie ŭ kišeniu. Mahčyma, prablemy z pamiaćciu ŭ takim uzroście. Ale chapaje i maładych ludziej. Dziaŭčat, chłopcaŭ, ludziej siaredniaha ŭzrostu. I tak štodnia, byvaje, i pa niekalki razoŭ na dzień. Centr horada».
«Zaŭsiodnikaŭ», kaža naša surazmoŭca, viedajuć u tvar i achoŭniki, i pradaŭcy. Byvajuć vypadki, kali achoŭnik litaralna supravadžaje pakupnika ŭ kramie, inakš niešta abaviazkova pasprabuje skraści. Ale nie va ŭsich vypadkach administracyi kramaŭ vyklikajuć milicyju: kali babulki pryznajucca, što nie zapłacili za tavar, ich škadujuć i adpuskajuć. Dziaciej — zdajuć u ruki baćkoŭ.
La Pietrapaŭłaŭskaj carkvy znajści Alinu Viktaraŭnu nie atrymlivajecca: žabrakoŭ siońnia tut niama. Ale ŭ carkoŭnaj łaŭcy, što pobač z «Rubloŭskim», kažuć, što žabračak tut mnoha, dziažurny baciuška štodnia ich niečym častuje.
