Viarchoŭny sud pakinuŭ u sile śmiarotny prysud, vyniesieny 31-hadovamu žycharu Minskaha rajona Siarhieju Chmialeŭskamu. U lutym 2016 hoda jon byŭ pryznany vinavatym u zabojstvie troch čałaviek i pryhavorany da vyklučnaj miery pakarańnia.
Siarhiej Chmialeŭski, fota Siarhieja Saciuka, BiełaPAN
Zabojstva ŭ vioscy Mačuliščy Minskaha rajona zdaryłasia 1 listapada 2014 hoda. Pavodle viersii śledstva, Chmialeŭski razam z susiedziami raśpivaŭ śpirtnyja napoi. Padčas uźnikłaj svarki jon nanios vosiem udaraŭ mužčynu i 12 udaraŭ žančynie. Achviary pamierli na miescy. Paśla hetaha złamyśnik padpaliŭ dom. U dvary jon ubačyŭ jašče adnaho susieda. Chmialeŭski z metaj likvidavać śviedku skinuŭ mužčynu ŭ hłybokuju jamu. Ad atrymanych traŭmaŭ paciarpieły pamior u balnicy.
Chmialeŭski taksama pryznany vinavatym u kradziažy i parušeńni ŭmovy previentyŭnaha nahladu.
Raniej Chmialeŭski byŭ nieadnarazova sudzimy — za kradziažy, razboj, rabavańnie, źbivańnie. Uvohule jon pravioŭ u miescach pazbaŭleńnia voli 13 hadoŭ.
Na sudzie jon pryznaŭ, što zabiŭ dvuch susiedziaŭ. Pryčynu rastłumačyć nie zdoleŭ, spasyłajučysia na mocnaje ałkaholnaje apjanieńnie. Treci susied, pavodle jaho słoŭ, upaŭ u jamu sam. Jon pryjšoŭ da doma zahinułych u nadziei schavacca ad milicyi, jakuju na jaho vyklikała žonka.
Pavodle słoŭ padsudnaha i jaho abaroncaŭ, u materyjałach spravy adsutničajuć vyčarpalnyja dokazy datyčnaści Chmialeŭskaha da śmierci treciaha susieda.
Pieršapačatkova za ŭčynienyja złačynstvy Chmialeŭski byŭ pryhavorany da pažyćciovaha źniavoleńnia. Svajaki zabitych nie piarečyli suprać hetaha rašeńnia. Pratest na prysud padaŭ prakuror z patrabavańniem zamianić mieru pakarańnia na vyklučnuju. Paźniej sud dovady dziaržabvinavaŭcy padtrymaŭ.
Na siońniašnim pasiadžeńni prakuror Alena Dziamko padkreśliła, što vina Chmialeŭskaha dakazanaja poŭnaściu.
Chmialeŭski maje prava źviarnucca z chadajnictvam ab pamiłavańni na imia kiraŭnika dziaržavy. Jon taksama maje prava nakiravać skarhu ŭ Kamitet AAN pa pravach čałavieka.
6 maja stała viadoma, što vykanany prysud u dačynieńni da adnaho z asudžanych na śmiarotnaje pakarańnie — žychara Rečycy Siarhieja Ivanova, pryznanaha vinavatym u žorstkim zabojstvie dziaŭčyny. Viadoma, što Ivanoŭ i Chmialeŭski ŭtrymlivalisia ŭ adnoj kamiery ŭ SIZA № 1 Minska.
U «kalidory śmierci» na Vaładarskaha znachodziacca jašče dvoje asudžanych — Ivan Kuleš (žorstkaje zabojstva troch čałaviek) i Hienadź Jakavicki (žorstkaje zabojstva adnaho čałavieka). Prysudy ab vyklučnaj miery pakarańnia nabyli moc.
Biełaruś zastajecca apošniaj krainaj u Jeŭropie i na postsavieckaj prastory, dzie da hetaha času prymianiajecca śmiarotnaje pakarańnie. Z momantu niezaležnaści da rasstrełu pryhavoranyja bolš za 400 čałaviek. Viadoma, što Alaksandr Łukašenka pamiłavaŭ tolki adnaho asudžanaha.
