Łampada ź Viflejemski ahniom (Viflijemskim śviatłom śvietu) prybudzie ŭviečary 19 śniežnia ŭ archikatedralny kaścioł Najśviaciejšaj Panny Maryi na staličnaj płoščy Svabody, paviedamlaje aficyjny sajt Rymska-katalickaha kaścioła ŭ Biełarusi.
U Biełaruś Viflejemski ahoń pryvieźli z Polščy. Sustreć jaho na biełaruskaj ziamli pryjechali miascovyja skaŭty, jakija i ŭzialisia raznosić śviatło śvietu pa ŭsioj krainie. Pieršym biełaruskim chramam, jakija pryniali čaścicu viečnaha ahniu, staŭ kafiedralny kaścioł Śviatoha Francyska Ksavieryja ŭ Hrodnie.
Šlach śviatła śvietu pačynajecca ŭ Viflijemie - adnym z centraŭ chryścijanskaha pałomnictva, dzie raźmieščana bazilika Rastva Chrystova. Chram uźviedzieny nad piačoraj, u jakoj, pavodle Biblii, Dzieva Maryja naradziła Isusa Chrysta. U hetaj piačory, jak ličycca, haryć viečny ahoń. Pačynajučy z 1986 hoda ad hetaha ahniu zapalvajecca maleńkaja śviečka, połymia jakoj i adpraŭlajecca ŭ padarožža pa płaniecie.
Upieršyniu Viflejemskaje śviatło śvietu prybyło 29 hadoŭ tamu ŭ aŭstryjski Linc u ramkach adnaho z dabračynnych mierapryjemstvaŭ na Kalady. Ad 1987 hoda i pa siońniašni dzień hetaja akcyja, jakaja atrymała nazvu «Śviatło ŭ ciemry», stała pravodzicca pad ehidaj aŭstryjskich aktyvistaŭ skaŭckaha ruchu.
