Ideju praviadzieńnia Kanhresa demakratyčnych sił užo padtrymali siem apazicyjnych lidaraŭ, jakija pahadzilisia ŭvajści ŭ arhkamitet, paviedamiŭ kandydat u prezidenty na vybarach 2010 hoda były palitviazień Mikałaj Statkievič.
Statkievič, a taksama Uładzimir Niaklajeŭ i Stanisłaŭ Šuškievič 18 śniežnia abviaścili ab stvareńni arhkamiteta pa padrychtoŭcy kanhresa. U sumiesnaj zajavie try palityki padtrymali apublikavany napiaredadni zvarot viadomych pradstaŭnikoŭ kultury i hramadskich dziejačaŭ da lidaraŭ i aktyvistaŭ apazicyi z zaklikam kansalidavacca i pravieści kanhres dla vypracoŭki sumiesnaha płana dziejańniaŭ.
Siońnia raniej Statkievič zajaviŭ, što «ideja praviadzieńnia kanhresa ŭžo navat pieraśpieła». «Tamu ja pačaŭ vykonvać techničnyja funkcyi i telefanuju ŭsim lidaram apazicyi. Ja hatovy prykłaści namahańni, kab paskoryć reakcyju lidaraŭ apazicyi, da jakich byŭ adrasavany ŭčarašni zvarot», — skazaŭ jon.
Palityk nazvaŭ imiony apazicyjnych lidaraŭ, jakija pahadzilisia ŭvajści ŭ arhkamitet kanhresa. Akramia jaho, Niaklajeva i Šuškieviča heta Źmicier Daškievič, Viačasłaŭ Siŭčyk, Andrej Sańnikaŭ i Hienadź Fiadynič.
Statkievič płanuje atrymać adkaz ad Alaksieja Janukieviča i Paŭła Sieviarynca. Akramia taho, jon nie viedaje, kali adkaža na jaho prapanovu Anatol Labiedźka i pakul nie viedaje reakcyju Alaksandra Milinkieviča i Iryny Vieštard.
Palityk paviedamiŭ, što nie źviartaŭsia z prapanovaj uziać udzieł u kanhresie demakratyčnych sił da lidaraŭ kampanii «Havary praŭdu» i da Biełaruskaj partyi levych «Spraviadlivy śviet».
