Zasucha, jakaja zdaryłasia na Kubie, moža adbicca na kala miljona žycharoŭ krainy.
Pavodle acenki Nacyjanalnaha klimatyčnaha centra krainy, samaja mocnaja za apošnija 100 hadoŭ zasucha zakranuła 70% terytoryi vostrava. Viedamstva acaniła ŭzrovień zasuchi na hetaj terytoryi jak «krajni» ci «mocny» u zaležnaści ad rehijona.
Ad zasuchi ŭžo paciarpieli bolš za miljon žycharoŭ Kuby, paviedamlaje bujny łacinaamierykanski telekanał Telesur TV.
Zasucha pryviała da surjoznych strat dla sielskaj haspadarki. Pavodle acenki ministerstva sielskaj haspadarki Kuby, u hetym hodzie budzie sabrana na 87 tys. t rysu mienš.
U nastupnym hodzie, zhodna z prahnozam viedamstva, uradžaj rysu składzie tolki 538 tys. t —heta pakryje tolki 60% unutranaha spažyvańnia rysu ŭ krainie. Rys — asnova racyjonu žycharoŭ vostrava.
Zasucha na vostravie praciahvajecca druhi hod zapar. Jana vyklikanaja klimatyčnym fienomienam El-Nińjo — heta vahańni tempieratury pavierchnievych vod Cichaha akijana ŭ rajonie ekvatara. Navukoŭcy miarkujuć, što dziakujučy El-Nińjo 2016 hoda moža akazacca samym haračym u historyi Ziamli. Ad zasuchi cierpiać i inšyja krainy Łacinskaj Amieryki, u tym liku Hvatemała, Handuras i Salvador.
Jašče ŭ žniŭni hetaha hoda ŭłady krainy papiaredžvali ab tym, što zasucha moža ŭzmacnicca. Akramia rysu, ad jaje paciarpieŭ uradžaj i inšych kultur, uklučajučy tytuń, nieabchodny dla suśvietna viadomych kubinskich cyhar.
