Jeŭrapiejskaja kamisija paćvierdziła vykanańnie Ukrainaj patrabavańniaŭ Płana dziejańniaŭ pa vizavaj libieralizacyi i rekamiendavała Radzie ES razhledzieć uviadzieńnie biaźvizavaha režymu dla Ukrainy ŭ 2016 hodzie.
«Biaźvizavamu režymu — być!» — napisaŭ u tvitary prezident Ukrainy Piatro Parašenka.
AFP
Taksama JEK paćvierdziła vykanańnie płana dziejańniaŭ pra vizy z Hruzijaj i Kosava. Radzie ES było rekamiendavana razhledzieć ŭviadzieńnie biaźvizavaha režymu dla hetych krain taksama ŭ 2016 hodzie.
Dyjałoh pa vizavaj libieralizacyi z Ukrainaj byŭ pačaty ŭ kastryčniku 2008 hoda. U 2010 hodzie Jeŭrakamisija pradstaviła uładam Ukrainy płan dziejańniaŭ pa vizavaj libieralizacyi.
«Prymajučy pad uvahu ahulny ŭzrovień adnosin pamiž ES i Ukrainaj, Jeŭrakamisija pradstavić u pačatku 2016 prapanovu pa dapaŭnieńni pastanovy Rady ES numar 539/2001», — havorycca ŭ dakładzie Jeŭrakamisii.
Hetaje pałažeńnie ŭtrymlivaje śpis krain, hramadzianam jakich patrebnaja viza dla karotkaterminovych pajezdak u ES i dziaržaŭ, jakija vyzvalenyja ad hetaha. Dla ŭniasieńnia źmianieńniaŭ u hetaje pałažeńnie Rada ES pavinna adobryć hetaje rašeńnie kansensusam usich 28 krain ES, zatym jaho pavinien zaćvierdzić Jeŭraparłamient.
Jeŭrapiejskaja kamisija siońnia kančatkova pryniała šostuju spravazdaču pa vykanańni Ukrainaj patrabavańniaŭ płana dziejańniaŭ vizavaj libieralizacyi.
Kijeŭ vykonvaje płan pa vizavaj libieralizacyi ź ES na praciahu apošnich piaci hadoŭ i ciapier padyšoŭ da apošniaj fazy.
U šostaj spravazdačy aceńvałasia, nakolki ŭkrainskija ŭłady dziejničali efiektyŭna pry dasiahnieńni metaŭ druhoj fazy płana. Hetaja spravazdača nie tyčycca tych pakazčykaŭ, jakija byli pryznanyja zdavalniajučymi pa vynikach piataha dakładu.
U liku pakazčykaŭ druhoj fazy libieralizacyi: upraŭleńnie miežami, upraŭleńnie mihracyjaj, baraćba z karupcyjaj i admyvańniem hrošaj, abarona nacyjanalnych i inšych mienšaściaŭ.
U listapadzie paśla mnohich niaŭdałych sprobaŭ Viarchoŭnaja Rada pryniała papraŭku, jakaja zabaraniaje dyskryminacyju ŭ śfiery pracy pa prykmietach seksualnaj aryjentacyi i hiendernaj identyčnaści. Heta było adnym z klučavych patrabavańniaŭ ES, pakolki ŭ vyniku vyklučajecca mahčymaść zvarotu za palityčnym prytułkam u ES z-za dyskryminacyi pry najmie na pracu abo prasoŭvańni pa słužbie na Ukrainie.
