Sajt haziety kp.by paviedamiŭ, što pravaachoŭnymi orhanami zatrymany były ministr handlu Valancin Čakanaŭ. Padrabiaznaści pakul nie paviedamlajucca.
Valancin Čakanaŭ akazaŭsia adzinym ministram sa staroha składu ŭrada, jakoha kiraŭnik dziaržavy ŭčora nie pryznačyŭ na pasadu nanova. Novym ministram handlu staŭ Uładzimir Kałtovič, jaki raniej byŭ daradcam-pasłańnikam pasolstva Biełarusi ŭ Rasii i namieśnikam staršyni Minharvykankama. A siońnia stała viadoma, što Valancin Čakanaŭ zatrymany. Padrabiaznaści pakul nie viadomyja.
— Spadar Čakanaŭ u vas? — spytali žurnalisty kiraŭnika KDB Valeryja Vakulčyka.
— Nie. Śledčy kamitet zajmajecca Čakanavym.
- Jaho zatrymali?
- Ja nie mahu skazać. Heta nie maje dadzienyja. KDB hetym pytańniem nie zajmaŭsia.
Valancinu Čakanavu 58 hadoŭ. Jon zajmaŭ ministerski fatel amal siem hadoŭ, sa studzienia 2009 hoda. Da hetaha byŭ namieśnikam dyrektara i dyrektaram pradpryjemstva «Biełbakaleja», pracavaŭ namieśnikam načalnika dziaržaŭnaj ustanovy materyjalna-techničnaha zabieśpiačeńnia Kiraŭnictva spravami prezidenta.
Były namieśnik ministra sielskaj haspadarki Vasil Pivavar taksama zatrymany
U pačatku śniežnia z pasady byŭ źniaty Vasil Pivavar, namieśnik ministra sielskaj haspadarki i charčavańnia i dyrektar departamienta vieterynarnaha i charčovaha nahladu. Farmuloŭka abviaščała: u suviazi z učynieńniem ŭčynku, niesumiaščalnaha sa znachodžańniem na dziaržaŭnaj słužbie.
— Namieśnik ministra sielskaj haspadarka Pivavar ŭ vas? - spytała kp.by ŭ Valeryja Vakulčyka.
— My pieradali spravu ŭ Śledčy kamitet.
— Jon zatrymany?
— Tak, užo nie ŭ nas, u SIZA na Vaładarskaha.
Jak paviedamlaje BiełaPAN, Vakulčyk paćvierdziŭ taksama fakt zatrymańnia namieśnika hienieralnaha dyrektara kampanii «Trajpł», kiraŭnika fiederacyj samba i dziudo, adnaho z kiraŭnikoŭ futbolnaha kłuba «Dynama» (Minsk) Uładzimira Japryncava i paviedamiŭ, što jon abvinavačvajecca ŭ machlarstvie.
Hladzi taksama: Chto ŭznačaliŭ Ministerstva handlu? Piać faktaŭ pra Uładzimira Kałtoviča
