Deputaty Pałaty pradstaŭnikoŭ na pasiadžeńni 18 śniežnia pryniali ŭ druhim čytańni zakonaprajekt «Ab respublikanskim biudžecie na 2016 hod».
Staršynia parłamienckaj kamisii pa biudžecie i finansach Ludmiła Dabrynina paviedamiła, što prajekt biudžetu byŭ sfarmiravany zychodziačy z pryjarytetu sacyjalna-ekanamičnaha raźvićcia krainy i staŭ «vynikam kampramisu palityčnych, ekanamičnych i sacyjalnych intaresaŭ». Papravak pry padrychtoŭcy zakonaprajekta da druhoha čytańnia ŭ deputataŭ nie było, dadała jana.
Dachody pa prajekcie respublikanskaha biudžetu praduhledžanyja ŭ sumie 180.590,2 młrd. rubloŭ, što vyšej za čakanaje vykanańnie biudžetu 2015 hoda na 9,6%. Asnoŭnymi krynicami padatkovych dachodaŭ źjaŭlajucca padatak na prybytak, akcyzy, padatkovyja dachody ad źniešnieekanamičnaj dziejnaści.
Raschody pa prajekcie respublikanskaha biudžetu na 2016 hod sfarmiravanyja ŭ sumie 163.417,9 młrd. rubloŭ, heta vyšej za čakanaje vykanańnie biudžetu 2015 hoda na 6,9%.
Prajekt biudžetu sfarmiravany z praficytam u 17.172,4 młrd. rubloŭ.
Na absłuhoŭvańnie dziaržaŭnaha doŭhu ź biudžetu ŭ 2016 hodzie płanujecca nakiravać bolš za 20 trłn. rubloŭ.
Jak paviedamlałasia raniej, ministr finansaŭ Uładzimir Amaryn, pradstaŭlajučy napiaredadni zakonaprajekt u pieršym čytańni, zaznačyŭ: «Najaŭnaja ekanamičnaja situacyja i vysoki ŭzrovień daŭhavoj nahruzki patrabujuć realizacyi žorstkaj biudžetnaj i padatkovaj palityki, uciahvańnia reziervaŭ, što majucca na ŭsich uzroŭniach biudžetnaj sistemy». «Pradstaŭleny prajekt biudžetu zbałansavany z ulikam najaŭnych resursaŭ i zabiaśpiečvaje finansavańnie najvažniejšych kirunkaŭ dziaržaŭnaj palityki», — zajaviŭ kiraŭnik Minfina.
Takim čynam, dla pryniaćcia prajekta biudžetu deputatam chapiła dvuch dzion. Dakumient pastupiŭ u Pałatu pradstaŭnikoŭ 16 śniežnia, 17 śniežnia — pryniaty ŭ pieršym čytańni i siońnia — u druhim. Taki chutki razhlad važnaha zakonaprajekta staršynia Pałaty pradstaŭnikoŭ Uładzimir Andrejčanka rastłumačyŭ tym, što «mnohija aktualnyja pytańni ŭdałosia abmierkavać na stadyi padrychtoŭki zakonaprajekta, deputaty ŭnosili pa im svaje praŭki, častka ź jakich była ŭličanaja».
