Zakon ab praviadzieńni refierendumu pa vychadzie Vialikabrytanii sa składu ES aficyjna pryniaty ŭ Złučanym Karaleŭstvie. Ab hetym paviedamiŭ kiraŭnik brytanskaha źniešniepalityčnaha viedamstva Filip Chamand, pieradajuć infarmahienctvy.
«Ciapier na adzin krok bližej da taho, kab dać brytancam skazać kančatkovaje słova nakont ES», — prakamientavaŭ ministr.
Hetu infarmacyju taksama paćvierdziŭ premjer-ministr Vialikabrytanii Devid Kemieran paśla prybyćcia na samit Jeŭrasajuza ŭ Brusieli. Pavodle jaho słoŭ, siońnia zakonaprajekt atrymaŭ karaleŭskuju sankcyju. U dakumiencie zakonaprajekta skazana, što refierendum nieabchodna pravieści nie paźniej za 31 śniežnia 2017 hoda.
Urad Vialikabrytanii ŭnios u parłamient zakonaprajekt ab refierendumie pa vychadzie ź ES Brytanii ŭ mai 2015 hoda. U pačatku vieraśnia nižniaja pałata parłamienta Vialikabrytanii prahałasavała za praviadzieńnie refierendumu ab členstvie krainy ŭ Jeŭrasajuzie da kanca 2017 hoda.
Premjer-ministr Vialikabrytanii Devid Kemieran pry hetym da praviadzieńnia refierendumu dabivajecca źmianieńnia ŭmoŭ členstva Vialikabrytanii ŭ ES i reform abjadnańnia. Kemieran vyłučyŭ pierad uładami ŭ Brusieli čatyry patrabavańni: pryznańnie ES multyvalutnym sajuzam, pavyšeńnie kankurentazdolnaści ŭnutry supolnictva, pašyreńnie paŭnamoctvaŭ nacyjanalnych parłamientaŭ u zakanatvorčaj dziejnaści ES i ŭzmacnieńnie mihracyjnaha zakanadaŭstva, jakoje praduhledžvaje błakiravańnie dostupu mihrantaŭ ź ES da sacyjalnych vypłat i pryvilej u Vialikabrytanii.
Paśla prybyćcia na samit ES u Brusieli kancler FRH Anhieła Mierkiel zajaviła, što Hiermanija chacieła b bačyć Vialikabrytaniju členam ES, ale vystupaje suprać źmianieńnia asnovatvornych pryncypaŭ supolnictva. «My, z našaha boku, chacieli zachavać Vialikabrytaniju ŭ składzie ES, ale adnačasova nie majem namieru abmiažoŭvać asnovatvornyja pryncypy ES - adsutnaść dyskryminacyi, svabodu pieramiaščeńnia», - skazała Anhieła Mierkiel. Pavodle jaje słoŭ, budzie adkrytaje abmierkavańnie hetaha pytańnia.
Prapanavanaja Łondanam reforma pavinna stać adnym z klučavych pytańniaŭ u paradku dnia ciapierašniaha samitu ES.
