Siaredniestatystyčny biełarus za svajo žyćcio śpić 26,6 hoda, prymaje ježu 3,9 hoda, hatuje ježu 2,5 hoda, hladzić televizar 5,8 hoda, čytaje mastackuju litaraturu ŭsiaho tolki 5 miesiacaŭ (pry siaredniaj praciahłaści žyćcia biełarusaŭ 73,2 hoda).
Takija dadzienyja ahučyła načalnik upraŭleńnia statystyki ŭzroŭniu žyćcia nasielnictva i abśledavańniaŭ damašnich haspadarak Nacyjanalnaha statystyčnaha kamiteta Ina Kanašonak na pasiadžeńni kruhłaha stała na temu «Vykarystańnie sutačnaha fondu času nasielnictvam Respubliki Biełaruś».
Ina Kanašonak adznačyła, što biełarusy śpiać bolš, čym amierykancy (25 hadoŭ) i anhličanie (26 hadoŭ). Amierykancy bolš času traciać na prahlad telepieradač (9 hadoŭ), a ŭ anhličan bolš času idzie na charčavańnie (4,3 hoda), čym u biełarusaŭ.
Na kruhłym stale adbyłasia prezientacyja vynikaŭ vybaračnaha abśledavańnia damašnich haspadarak, praviedzienaha Biełstatam u 2015 hodzie pry padtrymcy Dziciačaha fondu AAN (JUNISIEF) i Fondu AAN u halinie narodanasielnictva (JUNFPA). U abśledavańni pryniali ŭdzieł 6 tys. damašnich haspadarak (11 tys. čałaviek), jakija pražyvajuć va ŭsich abłaściach i Minsku. Vyniki abśledavańnia dali mahčymaść atrymać detalizavany partret sacyjalnych pavodzin mužčyn i žančyn, darosłych i dziaciej, haradžan i viaskoŭcaŭ, vyvučyć aryjentacyi i matyvacyi praviadzieńnia času pa asobnych hrupach nasielnictva i typach damašnich haspadarak.
