Leninski sud Mahilova razhladaje spravu byłoha lejtenanta milicyi Viktara Dziukava, jaki abvinavačvajecca, u pryvatnaści, u machlarstvie, dačy chabaru i prysvajeńni zvańnia abo ŭłady słužbovaj asoby.
U kancy 2014 hoda Dziukaŭ byŭ zatrymany pa padazreńni ŭ machlarstvie i padbuchtorvańni da dačy chabaru. Śledčyja orhany paviedamlali, što padazrony nazyvaŭsia padpałkoŭnikam milicyi ŭ adstaŭcy, členam mižnarodnaj arhanizacyi i vieteranaŭ kryminalnaha vyšuku, jurystam 1-ha kłasa. Śledstva ŭstanaviła, što Dziukaŭ, dobra viedajučy pra toje, što jaho znajomy nie moža samastojna zdać ekzamien va ŭpraŭleńni DAI Mahiloŭskaha abłvykankama na prava kiravańnia transpartnymi srodkami, vioŭ ź im pieramovy i padbuchtorvaŭ da dačy chabaru supracoŭnikam DAI za spryjalnaje vyrašeńnie pytańnia. Siabie jon prapanavaŭ u jakaści pasrednika, jaki i pavinien byŭ pieradać niezakonnuju ŭznaharodu słužbovym asobam Dziaržaŭtainśpiekcyi.
Zhodna z materyjałami kryminalnaj spravy, abnarodavanymi 14 śniežnia padčas sudovaha pasiadžeńnia, Dziukaŭ sapraŭdy słužyŭ opierupaŭnavažanym u adździele pa baraćbie z ekanamičnaj złačynnaściu Leninskaha RAUS. U 1991 hodzie ŭ zvańni lejtenanta milicyi byŭ zvolnieny za ŭčynak, jaki dyskredytavaŭ zvańnie supracoŭnika ŭnutranych spraŭ.
Paśla mnohich hadoŭ jon staŭ zapeŭnivać kaleh, jakija vyjšli ŭ zapas, što słužyŭ u rasijskaj milicyi i dasłužyŭsia da padpałkoŭnika. U vieteranskaj arhanizacyi Leninskaha RAUS vieryli byłomu kalehu i navat uručali jamu hrašovyja premii i inšyja zaachvočvańni, pakul u śniežni 2014 hoda ŭ ŚMI nie źjaviłasia infarmacyja ab zatrymańni Dziukava.
U 2012—2013 hadach, zhodna z materyjałami spravy, padsudny taksama aktyŭna supracoŭničaŭ z rasijskaj hramadskaj arhanizacyjaj vieteranaŭ apieratyŭnych słužbaŭ «Honar». Ad jaje ŭ vieraśni 2013 hoda jon atrymaŭ miedal «95 hadoŭ kryminalnamu vyšuku» i navat braŭ udzieł u adkryćci kala budynka UUS Babrujskaha harvykankama pamiatnaha znaka rodanačalniku rasijskaj kryminalistyki, zahadčyku kryminalnaha vyšuku Rasii Arkadziu Kaško i jaho bratu, hienierał-hubiernataru Piermi Ivanu Kaško. Na sajcie «Honaru», u šerahi jakoha Dziukaŭ byŭ pryniaty ŭ vieraśni 2014 hoda, jon dahetul zhadvajecca jak namieśnik načalnika abłasnoha UUS.
Na sudzie Dziukaŭ chadajničaŭ ab zapycie, jakim čynam ź jaho asabistaj elektronnaj pošty była atrymana infarmacyja ab śpisach supracoŭnikaŭ milicyi, uznaharodžanych «Honaram», ich fatahrafii. Sudździa paličyła niemetazhodnym rabić taki zapyt, pakolki, pavodle jaje słoŭ, hetaja infarmacyja była taksama atrymanaja i ź inšych krynicaŭ. «Vy možacie napisać skarhu na pravamiernaść dostupu śledčaha da vašaj pošty», — skazała jana.
Nastupnaje pasiadžeńnie pa spravie Dziukava pryznačana na 15 śniežnia.
