Partyja BNF na hety momant vyrašyła ŭstrymacca ad uvachodžańnia ŭ kaalicyi. Adpaviednaje rašeńnie pryniataje sojmam arhanizacyi 12 śniežnia ŭ Minsku.
Da pytańnia pra mahčymaje ŭvachodžańnie ŭ kaalicyju pravacentrysckich sił, kudy ŭvajšli b taksama ruch «Za Svabodu», Abjadnanaja hramadzianskaja partyja i arhkamitet pa stvareńni BCHD, Partyja BNF płanuje viarnucca, kali «jano naśpieje».
Sojm taksama pryniaŭ rašeńnie farmiravać svoj śpis kandydataŭ na parłamienckija vybary 2016 hoda i iści na ich sa svaim pasłańniem. Na hety momant uvajści ŭ śpis kandydataŭ zhadzilisia 30 partyjnych aktyvistaŭ.
Nahadajem, pradstaŭniki čatyroch apazicyjnych struktur — ruchu «Za Svabodu», Abjadnanaj hramadzianskaj partyi, arhkamiteta pa stvareńni partyi «Biełaruskaja chryścijanskaja demakratyja» i Partyi BNF — padčas svajho vizitu ŭ Brusiel 15—19 listapada padpisali dekłaracyju ab kaardynacyi dziejańniaŭ. Dakumient taksama padpisaŭ Žazef Dol, prezident Jeŭrapiejskaj narodnaj partyi, pavodle zaprašeńnia jakoj prachodziŭ vizit. Dekłaracyja praduhledžvaje składańnie śpisa kandydataŭ na parłamienckich vybarach 2016 hoda i vyłučeńnie adzinaha kandydata ŭ prezidenty na vybarach 2020 hoda.
9—11 śniežnia adbyŭsia jašče adzin vizit u Brusiel pradstaŭnikoŭ troch z čatyroch arhanizacyj. Admovu ad udziełu ŭ vizicie pradstaŭnika Partyi BNF jaje staršynia Alaksiej Janukievič rastłumačyŭ rašeńniem pašyranaha pasiadžeńnia palityčnaj kamisii partyi z udziełam kiraŭnikoŭ rehijanalnych struktur, jakoje adbyłosia 8 śniežnia. «My abmierkavali pytańnie stvareńnia kaalicyi čatyroch arhanizacyj. Było pryniataje rašeńnie rekamiendavać sojmu, pasiadžeńnie jakoha adbudziecca 12 śniežnia, nie ŭvachodzić u hetuju i lubyja inšyja kaalicyi abo śpisy kandydataŭ na parłamienckich vybarach 2016 hoda. Taksama jość rekamiendacyja palityčnaj kamisii, kab na vybarach-2016 Partyja BNF udzielničała sa svaim śpisam kandydataŭ i pasłańniem, kab raspaŭsiudžvać u hramadstvie našy idei i kaštoŭnaści», — zajaviŭ jon raniej BiełaPAN.
Siońnia na sojmie Janukievič adznačyŭ, što kali zaraz partyja ŭvojdzie ŭ kaalicyju i stanie farmiravać sumiesny śpis, to budzie mieć «dvuch nie nadta nadziejnych partnioraŭ — BCHD i AHP».
Udzielničajučy ž u vybarach samastojna, partyi nie treba ŭzhadniać pazicyi ź inšymi strukturami. «My zmožam sami prasoŭvać svaje pazicyi. Ale jość i ryzyka: kali nie zdolejem vyłučyć mocnych kandydataŭ i pravieści mocnuju kampaniju, to dadzim usim našym niepryjacielam padstavu dla krytyki», — skazaŭ jon.
