Kiraŭnik Biełaruskaj fiederacyi futboła Siarhiej Rumas na cyrymonii zakryćcia futbolnaha siezonu «Zorny miač» padzialiŭsia mierkavańniem pra toje, što ŭ navinach ab pravaparušeńniach pa-raniejšamu zhadvajuć, što jany ździejśnienyja fanatami, piša Priessboł.
Fota Vadzima Zamiroŭskaha, Tut.by
«My razam ź Siarhiejem Safarjanam [namieśnik staršyni BFF — NN] asabista sustrakalisia ź ministram MUS i, dumaju, znajšli parazumieńnie pa pytańni ŭzajemaadnosin milicyi i fanataŭ. Apošnija naviny ab pravaparušeńniach, dzie zhadvajecca, što jany ździejśnienyja fanatami? Treba jašče raz padniać hetaje pytańnie. Ale naohuł liču tak: nie pišuć bo, što kramu abrabavaŭ, skažam, člen BRSM abo były milicyjant», — skazaŭ S. Rumas.
***
Nahadajem, što na pres-kanfierencyi 30 listapada Siarhiej Safarjan, kamientujučy vyniki sustrečy kiraŭnictva BFF i MUS, skazaŭ, što ministr unutranych spraŭ Ihar Šunievič daŭ daručeńnie padnačalenym nie ŭzhadvać prynaležnaść hramadzian da fanackich hrupovak, kali ich pravaparušeńni nie źviazanyja sa spartyŭnymi mierapryjemstvami.
Zhadka ŭ milicejskich zvodkach prynaležnaści pravaparušalnikaŭ da fanackaha ruchu pačaściłasia paśla našumiełaha incydentu na adboračnym matčy futbolnaha čempijanatu Jeŭropy 2016 pamiž zbornymi Biełarusi i Makiedonii 12 kastryčnika. Tady try zaŭziatary byli zatrymanyja za šaliki z histaryčnym hierbam «Pahonia». Milicyja ž śćviardžała, što fanaty byli pjanyja i nie padparadkoŭvalisia zakonnym patrabavańniam pravaachoŭnikaŭ.
«Idzie pravaparušeńnie abo złačynstva, abaviazkova pišacca: heta — fanat. Ministr daŭ adpaviednaje daručeńnie. Kali pravaparušeńnie nie źviazana z futbolnymi, chakiejnymi, handbolnymi i inšymi matčami, a ździejśniena ŭ pobycie abo hramadskim miescy, nie maje nijakaha značeńnia, ci źjaŭlajecca čałaviek fanatam», - skazaŭ 30 listapada Siarhiej Safarjan.
