13 śniežnia adkryvajecca štodzionny bieśpierasadačny ruch Minsk — Varšava, paviedamili ŭ pres-słužbie Biełaruskaj čyhunki.
Pavodle infarmacyi BČ, «z metaj zabieśpiačeńnia rehularnych transpartnych znosin z krainami ES i z uvodam novaha hrafika ruchu ciahnikoŭ na 2015-2016 hady Biełaruskaja čyhunka z 13 śniežnia pryznačyła u štodzionny zvarot dva bieśpierasadačnyja vahony Minsk — Varšava». Hetyja vahony buduć kursavać u składzie ciahnika № 9/10 Maskva — Varšava.
Ź Minska ciahnik zhodna z novym hrafikam adpraŭlajecca ŭ 1.16 i prybyvaje na stancyju Varšava-Centralnaja ŭ 8.55. Čas adpraŭleńnia zvarotnaha składu sa stancyi Varšava-Centralnaja — 18.53, prybyćcio ŭ Minsk — ranicaj nastupnaha dnia ŭ 7.24.
U svaju čarhu ciahnik № 115/116 Minsk — Varšava, jaki sioleta kursavaŭ dvojčy na tydzień i adpraŭlaŭsia ź Minska pa paniadziełkach i čaćviarhach, z uvodam novaha hrafika budzie pryznačacca «pa ŭkazańni».
Biełaruskaja čyhunka nahadała, što hrafik ruchu ciahnikoŭ na 2015-2016 hady ŭvodzicca na darohach krain SND z 0.00 13 śniežnia. U mižnarodnym ruchu novy hrafik praduhledžvaje pastajannaje kursavańnie 30 par pasažyrskich ciahnikoŭ farmiravańnia BČ.
