Dziaržstandart Biełarusi zabaraniŭ uvoz i abarot na rynku krainy śviacilniaŭ tureckaj i rasijskaj vytvorčaści, paviedamili ŭ pres-słužbie kamiteta. Niebiaśpiečnaja pradukcyja vyjaŭlenaja Hrodzienskaj abłasnoj inśpiekcyjaj, a taksama inśpiekcyjaj pa Minskaj vobłaści i Minsku.
Tak, u TAA «BPŁelektra» (Lida) realizoŭvalisia stolevyja śviacilni handlovaj marki TDM ELECTRIC tureckaj vytvorčaści, u jakich nie była zabiaśpiečanaja abarona spažyŭcoŭ ad paškodžańnia elektryčnym tokam, što patrabuje techničny rehłamient Mytnaha sajuza i dziaržaŭnyja standarty na hetuju pradukcyju. Padčas vyprabavańniaŭ patron lampy adchiliŭsia ad svajho miesca, a mantažny praboj advaliŭsia ad korpusa śviacilni. Elektryčnyja kantakty patrona byli lohkadastupnymi, što nie dapuskajecca dziejnymi standartami. U vyniku śpiecyjalisty zrabili zaklučeńnie, što ekspłuatacyja takich śviacilniaŭ stvaraje niebiaśpieku dla žyćcia spažyŭcoŭ.
Zabarona na realizacyju śviacilniaŭ vydadziena i handlovamu abjektu ZAT «Nipieks» (Minsk). Tak, u śviacilniach handlovaj marki «Technaluks» (vytvorčaść TAA AETZ «Rekord», horad Alaksandraŭ Uładzimirskaj vobłaści RF) vyjaŭlena nieadpaviednaść patrabavańniam techničnaha rehłamientu Mytnaha sajuza «Elektramahnitnaja sumiaščalnaść techničnych srodkaŭ» pa stvaranych elektramahnitnych pieraškodach. Zafiksavana pieravyšeńnie ŭstanoŭlenych značeńniaŭ harmaničnych składalnikaŭ toku, što moža stvaryć pieraškody dla pracy inšaha elektryčnaha, kantrolna-vymiaralnaha abstalavańnia, vyklikać zboi elektrasuviazi i vychad lampaŭ sa stroju.
Na hetyja vidy pradukcyi na terytoryi krainy spyniena dziejańnie vydadzienych siertyfikataŭ adpaviednaści Mytnaha sajuza.
U miežach infarmacyjnaha ŭzajemadziejańnia Dziaržstandart nakiravaŭ ukazanuju vyšej infarmacyju abłasnym inśpiekcyjam, inšym nahladnym orhanam jak u respublicy, tak i ŭ JEAES.
Usiaho za 11 miesiacaŭ 2015 hoda Dziaržstandartam zabaronieny ŭvoz i abarot 248 najmieńniaŭ niebiaśpiečnaj pradukcyi, na 190 najmieńniaŭ spažyvieckich tavaraŭ spyniena (prypyniena) dziejańnie na terytoryi respubliki dakumientaŭ ab paćviardžeńni adpaviednaści Mytnaha sajuza.
Takija miery ŭžyvajucca pavodle ŭkaza prezidenta № 48 ad 9 lutaha 2015 hoda «Ab mierach pa zabieśpiačeńni dziaržaŭnaha kantrolu (nahladu) za vykanańniem patrabavańniaŭ techničnych rehłamientaŭ».
