Hałoŭnym upraŭleńniem pa baraćbie z arhanizavanaj złačynnaściu i karupcyjaj MUS Biełarusi praviedziena pravierka ŭ dačynieńni da słužbovych asob Vałožynskaha rajona. Namieśnik staršyni vykankama zatrymany.
Jak paviedamlaje MUS, supracoŭniki 10-ha ŭpraŭleńnia (pa Minskaj vobłaści) HUBAZiK MUS praanalizavali vykanańnie zakonnaści pry asvajeńni biudžetnych srodkaŭ, jakija vydatkoŭvajucca na rekanstrukcyju i budaŭnictva ab`iektaŭ sacyjalnaha značeńnia na terytoryi Vałožynskaha rajona. Ustanoŭlena, što ŭ listapadzie 2013 hoda namieśnik staršyni rajonnaha vykanaŭčaha kamiteta pa pytańniach budaŭnictva i ŽKH sadziejničaŭ nieabhruntavanamu pieraliku na karyść adnaho z pryvatnych pradpryjemstvaŭ 2 młrd rubloŭ.
Hrošy ź dziaržbiudžetu nakiroŭvalisia na rachunak niby vykananych budaŭničych rabot, jakija faktyčna nie ažyćciaŭlalisia. Za spryjalnaje vyrašeńnie pytańnia, jakoje ŭvachodzić u kampietencyju ŭkazanaj słužbovaj asoby, jon atrymaŭ u jakaści chabaru tavarna-materyjalnyja kaštoŭnaści bolš jak na 10 młn rubloŭ (1.200 dalaraŭ ZŠA na momant učynieńnia złačynstva).
Padpisańnie falšyvych aktaŭ ab vykanańni budaŭničych rabot pryviało da niaŭčasnaha ŭvodu ŭ ekspłuatacyju žyłoha šmatkvaternaha doma, u tym liku dla hramadzian, jakija majuć patrebu ŭ palapšeńni žyllovych umoŭ, i pavieličeńnia kančatkovaha koštu budaŭnictva.
Upraŭleńniem Śledčaha kamiteta pa Minskaj vobłaści zatrymanamu vystaŭlenaje abvinavačańnie na padstavie č. 3 art. 430 KK (atrymańnie chabaru), vybrana miera strymańnia ŭ vyhladzie źmiaščeńnia pad vartu. Pravodziacca dalejšyja apieratyŭna-vyšukovyja mierapryjemstvy i śledčyja dziejańni. Praviarajecca inšaja infarmacyja pra mahčymyja parušeńni zakanadaŭstva z boku fihuranta i inšych słužbovych asob Vałožynskaha rajona.
