Biełaruś naroščvaje supracoŭnictva ź Zimbabve ŭ mnohich siektarach ekanomiki, ad sielskaj haspadarki da zdabyŭnaj pramysłovaści.
U siaredzinie listapada hałoŭnaja ŭradavaja hazieta Zimbabve The Herald tryumfalna paviedamiła, što kiraŭnik hetaj krainy Robiert Muhabe daŭ zhodu na realizacyju šerahu inviestycyjnych prajektaŭ ź Biełaruśsiu paśla sustrečy ź Viktaram Šejmanam, kiraŭnikom spravami prezidenta Biełarusi.
Adnak zaniapad ekanomiki Zimbabve i mižnarodnaja izalacyja hetaj krainy, a taksama strakataja historyja dvuchbakovaha supracoŭnictva Biełarusi i Zimbabve vyklikajuć surjoznyja sumnievy što da realistyčnaści hetych «miehaŭhodaŭ».
Šery kardynał Łukašenki zaklučaje «miehaŭhody»
Viktar Šejman prybyŭ u Charare 15 listapada ŭ jakaści asabistaha pasłańnika prezidenta Biełarusi. 18 listapada jon sustreŭsia z prezidentam Zimbabve Robiertam Muhabe, jaki daŭ zialonaje śviatło supracoŭnictvu pamiž dźviuma krainami ŭ pytańniach pastaŭki techniki dla zdabyŭnaj pramysłovaści i sielskaj haspadarki.
Muhabe i Šejman taksama abmierkavali pytańni supracoŭnictva ŭ halinie enierhietyki, budaŭnictva daroh, damoŭ i mastoŭ, a taksama navučańnia zimbabvijskich studentaŭ u Biełarusi. «My ruchajemsia da šyrokamaštabnaha dvuchbakovaha supracoŭnictva, i heta vyhladaje vielmi aptymistyčna», — skazaŭ Šejman.
U Charare Viktar Šejman taksama padpisaŭ pahadnieńnie ab stvareńni sumiesnaha pradpryjemstva pa zdabyčy zołata i inšych kaštoŭnych minierałaŭ ź ministram hornazdabyŭnoj pramysłovaści Zimbabve i kiraŭnikom Reziervovaha Banka.
Pa słovach ministra hornazdabyŭnoj pramysłovaści, «hetaje pahadnieńnie daść nam dostup da abstalavańnia i technałohij ź Biełarusi, u pryvatnaści heta tyčycca zdabyčy na rekach». Varta adznačyć, što dahetul nie miełasia źviestak pra budź-jaki dośvied Biełarusi ŭ halinie zdabyčy resursaŭ na rekach.
Liślivyja ŭradavyja ŚMI Zimbabve pradstavili hetyja pahadnieńni ź Biełaruśsiu vyklučna ŭ terminach «miehaŭhodaŭ», jakija, jak miarkujecca, pryniasuć Zimbabve roskvit. Miascovyja čynoŭniki, takija jak ministr finansaŭ Patryk Čynamasa i žonka prezidenta Muhabe Hrejs, chvalilisia nakont pastavak abstalavańnia ź Biełarusi na sustrečach z pradprymalnikami i miascovym nasielnictvam.
Dziŭna, ale biełaruskija dziaržaŭnyja miedyja, jakija zvyčajna z praźmiernym zachapleńniem apaviadajuć pra praryŭnyja supolnyja prajekty Biełarusi z zamiežnymi ŭradami, zachoŭvajuć poŭnaje maŭčańnie pra pajezdku Šejmana ŭ Zimbabve.
Jeŭrapiejski i afrykanski «farposty tyranii»
Biełaruś i Zimbabve majuć mnoha padabienstvaŭ va ŭnutranaj palitycy i mižnarodnaj reputacyi. Abiedźvie krainy majuć vielmi vysokuju inflacyju i niaźmiennych prezidentaŭ, jakija ŭtrymlivajuć uładu praz pryhniot apazicyi i falsifikacyju vybaraŭ. Robiert Muhabe kiruje krainaj z 1987 hoda i ciepier znachodzicca na svaim šostym prezidenckim terminie; Alaksandr Łukašenka va ŭładzie z 1994 hoda i kiruje ŭžo piaty termin.
U studzieni 2005 hoda, na słuchańniach kamiteta pa zamiežnych spravach Sienata ZŠA, dzie razhladałasia jaje zaćviardžeńnie na pasadzie dziaržsakratara, Kandaliza Rajs acharaktaryzavała Biełaruś i Zimbabve (razam z Mjanmaj, Kubaj, Iranam i Paŭnočnaj Karejaj) jak «farposty tyranii». Zimbabve zaŭsiody prysłužliva padtrymlivała Biełaruś na mižnarodnym uzroŭni, kali taja była mišeńniu krytyčnych dakładaŭ pravaabarončych instytucyj.
Abiedźvie krainy znachodziacca ŭ ciapierašni čas pad vizavymi i ekanamičnymi sankcyjami ZŠA i ES (choć bolšaść sankcyj suprać Biełarusi ŭ apošni čas była prypyniena). Adnak mižnarodnyja pravaabarončyja arhanizacyi krytykujuć Zimbabve mienš, čym Biełaruś.
Doŭhaja historyja niespraŭdžanych čakańniaŭ
Biełaruś i Zimbabve naładzili dypłamatyčnyja adnosiny ŭ krasaviku 1992 hoda. Pačynajučy z 2001 hoda abiedźvie krainy pačali abmien vizitami ŭradavych delehacyj, pieršapačatkova na ŭzroŭni ministraŭ. Vice-prezidenty Zimbabve Džon Nkoma i Emiersam Mnanhahva naviedvali Minsk, adpaviedna, u 2011 i 2015 hadach.
Usie hetyja hady adnosiny pamiž krainami raźvivalisia pradkazalnym čynam. Kožnaja delehacyja Zimbabve, naviedaŭšy tuzin biełaruskich vytvorčych pradpryjemstvaŭ, vykazvała zachapleńnie pramysłovymi mahčymaściami i technałohijami Biełarusi i vykazvała šmat entuzijazmu nakont pierśpiektyŭ dvuchbakovaha handlu. Biełaruski lidar prymaŭ kožnuju delehacyju i mroiŭ pra bujnyja kantrakty i vialikuju budučyniu.
Tym nie mienš za hety čas dobra pradstaŭlenyja ŭ miedyja vizity mieli nievialiki ŭpłyŭ na dvuchbakovy handal.
|
| 2010 | 2011 | 2012 | 2013 | 2014 |
| Ekspart ź Biełarusi ŭ Zimbabve, młn dał. ZŠA | 0,1 | 0,1 | 0,8 | 0,4 | 12,4 |
| Impart u Biełaruś ź Zimbabve, młn dał. ZŠA | 2,6 | 2,3 | 5,5 | 3,2 | 4,8 |
Adnosny praryŭ adbyŭsia ŭ 2014 hodzie, kali BiełAZ, biełaruski vytvorca karjernaj techniki, pastaviŭ 17 adzinak svajho abstalavańnia (samazvały, pahruzčyki i buldoziery) dla vuhalnaj šachty Hwange Colliery ŭ Zimbabve. Mašyny byli pastaŭlenyja praz schiemu finansavańnia z boku pastaŭščyka, harantavanuju rehijanalnym bankam PTA.
U listapadzie 2009 hoda Biełaruś pradstaviła dla razhladu ŭładam Zimbabve prajekty pahadnieńniaŭ ab handlova-ekanamičnym supracoŭnictvie, a taksama ab zaachvočvańni i ŭzajemnaj abaronie inviestycyj. Na siońniašni dzień pieršaj i adzinaj paŭnavartasnaj jurydyčnaj damovaj pamiž dźviuma krainami zastajecca miemarandum ab uzajemarazumieńni pamiž ministerstvami justycyi Biełarusi i Zimbabve, padpisany ŭ Minsku 22 lipienia 2015 hoda.
Ryzykoŭny biznes z partnioram-bankrutam
Pajezdka Viktara Šejmana ŭ Charare adbyłasia nieŭzabavie paśla vizitu vice-prezidenta Zimbabve Emiersana Mnanhahvy ŭ Minsk u lipieni 2015 hoda. Čynoŭnik naviedaŭ ź dziasiatak biełaruskich vytvorčaściaŭ i sustreŭsia z šyrokim kołam asobaŭ, ad prezidenta Alaksandra Łukašenki da biełaruskaha Dzieda Maroza.
Padčas taho vizita paviedamlałasia, što Biełaruś i Zimbabve padpisali miemarandum ab pastaŭcy afrykanskaj dziaržavie abstalavańnia dla sielskaj haspadarki, hornazdabyŭnoj pramysłovaści, budaŭnictva płacinaŭ i daroh na sumu 150 młn dalaraŭ.
Alaksandr Łukašenka, vitajučy svajho zimbabvijskaha hościa, prapanavaŭ stvaryć centr techničnaha absłuhoŭvańnia transpartnych srodkaŭ u Zimbabve, jaki moh by dapamahčy Biełarusi ŭvajści na afrykanski rynak. Łukašenka bačyć Zimbabve ŭ jakaści handlovaha partału ŭ Afrycy dla Biełarusi.
Biełaruś pahadziłasia finansavać pastaŭki svajho abstalavańnia ŭ Zimbabve. Padpisvajučy pahadnieńnie z premjer-ministram Biełarusi Andrejem Kabiakovym, Emiersan Mnanhahva adznačyŭ, što finansavyja ŭstanovy Zimbabve harantujuć uvieś abjom apłaty pastavak.
Pavodle ŭzhodnienych terminaŭ, Zimbabve pačnie atrymlivać mašyny i abstalavańnie ŭ pieršym kvartale 2016 hoda. U pryvatnaści MAZ maje płany pa pastaŭkach prynamsi 100 mašyn z pravym rulavym kiravańniem u Zimbabve.
Tym nie mienš niezaležnyja srodki masavaj infarmacyi Zimbabve adznačyli, što papiarednija padobnyja «miehaŭhody», u tym liku tyja, jakija Zimbabve padpisała z Rasijaj i Kitajem, zastajucca tolki zajavami ab namierach. Zimbabve nie ŭdałosia pahasić kredyty, dadzienyja Kitajem na ahulnuju sumu kala $1,5 młrd.
Taja ž dola moža čakać uhody, padpisanyja sioleta pamiž Minskam i Charare. Biełaruś pajšła na vielmi ryzykoŭny biznes z rodnasnym režymam, sumna viadomym svaimi pastajannymi finansavymi i ekanamičnymi niaŭdačami.
Jašče adna prablema hetych «miehaŭhodaŭ» vynikaje z typu asobaŭ, jakija ŭdzielničajuć u ich raspracoŭcy i ažyćciaŭleńni. Emierson Mnanhahva źjaŭlajecca samym bahatym čałaviekam Zimbabve, jaki nieadnarazova abvinavačvaŭsia ŭ karupcyi.
Viktar Šejman zvyčajna dapamahaje Łukašenku ŭ padpisańni ŭhodaŭ, kali patrabujecca krajniaja kanfidencyjnaść. Zhadanyja faktary i adsutnaść prazrystaści ŭ finansavańni hetych prajektaŭ staviać pad sumnieŭ sapraŭdnuju pryrodu supracoŭnictva Biełarusi i Zimbabve.
