Sud Łuninieckaha rajona 8 śniežnia vynies prysud za machlarstva 20-hadovaj žycharcy Baranavickaha rajona, jakaja nidzie nie pracuje.
Jak paviedamiŭ namieśnik prakurora Łuninieckaha rajona Andrej Łukaševič, jaki padtrymlivaŭ dziaržaŭnaje abvinavačańnie pa spravie, dniom 4 kastryčnika ŭ Łunincy dziaŭčyna pryjšła ŭ dom da 86-hadovaha mužčyny. Jana zajaviła, što pryjechała ź Minska, dzie pracuje ŭ słužbie pa akazańni dapamohi pažyłym i invalidam.
«Sacyjalny rabotnik» paviedamiła ab abmienie ŭ krainie starych hrošaj na novyja i prapanavała piensijanieru svaju dapamohu ŭ abmienie. Takim čynam jana zavałodała 16 młn rubloŭ, napisała raśpisku ad imia vydumanaj asoby ab pryjomie ŭ piensijaniera hetych hrošaj i paabiacała praź niekalki dzion prynieści kupiury novaha ŭzoru.
Praź niekalki chvilin paśla sychodu dziaŭčyny piensijanier i jaho žonka zapadozryli niadobraje i patelefanavali ŭ milicyju. 20-hadovuju złamyśnicu zatrymali pa darozie na vakzał, u jaje byli kanfiskavany 16 młn rubloŭ.
Sud Łuninieckaha rajona pryznaŭ dziaŭčynu vinavataj pa č. 1 art. 209 KK (machlarstva) i pryhavaryŭ da 240 hadzin hramadskich rabot. Sud pryniaŭ da ŭvahi, što abvinavačvanaja raniej da kryminalnaj adkaznaści nie pryciahvałasia i ščyra raskajałasia ŭ sadziejanym. Pryhavor jašče nie nabyŭ zakonnuju moc i moža być abskardžany.
Jak dapoŭniŭ Łukaševič, kryminalnaja sprava razhladałasia na vyjaznym pasiadžeńni ŭ Łuninieckim haradskim Domie kultury. «Na sudovaje pasiadžeńnie pa inicyjatyvie prakuratury byli zaprošany pažyłyja žychary horada. Ź imi praviedziena hutarka ab tym, što treba być aściarožnymi, kab nie paciarpieć ad machlarstva», — skazaŭ Łukaševič.
