U Minsku 7 śniežnia pabity tempieraturny rekord dnia, paviedamiła hałoŭny sinoptyk Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Minpryrody Śviatłana Rybakova.
«Tempieratura pavietra ŭ Minsku siońnia pierasiahnuła 8 hradusaŭ ciapła, pakul heta maksimalnaja tempieratura, jakaja była zafiksavana 7 śniežnia za ŭsiu historyju mieteanazirańniaŭ. Papiaredni rekord zafiksavany ŭ 2006 hodzie, tady pavietra prahrełasia da plus 7,3 hradusa», — adznačyła Śviatłana Rybakova.
Pavodle słoŭ hałoŭnaha sinoptyka Hidramieta, absalutny maksimum śniežnia zafiksavany 5 i 6 śniežnia 1961 hoda i skłaŭ 10,3 hradusa ciapła. A samym ciopłym za ŭsiu historyju mieteanazirańniaŭ u Minsku staŭ śniežań 2006 hoda, kali siaredniaja tempieratura pa miesiacy skłała 2,6 hradusa ciapła pry normie minus 4.
Ciopłaje nadvorje ŭtrymlivajecca na terytoryi Biełarusi ŭžo na praciahu troch dzion, jano na 6-10 hradusaŭ vyšej za klimatyčnuju normu.
Jak paviedamlałasia, ciapierašniaja zima ŭ Biełarusi čakajecca ciopłaj, tempieratura pavietra budzie na 1-2 hradusy vyšej za klimatyčnuju normu. Siaredniaja tempieratura pavietra ŭ śniežni budzie na 1 hradus vyšej za klimatyčnuju normu (norma - 2-5 hradusaŭ marozu). Kolkaść apadkaŭ čakajecca krychu bolšaj za normu, pa poŭdni — kala normy (32-44 mm).
