Byłaja pryjomnaja maci z Klimavič Iryna Mocnaja, asudžanaja na čatyry hady, spadziajecca na ŭmoŭna-daterminovaje vyzvaleńnie ź miesca źniavoleńnia.
Nahadajem, u śniežni 2014 hoda sud u Klimavičach pryznaŭ byłuju pryjomnuju maci vinavataj u złoŭžyvańni pravami apiekuna i pryhavaryŭ da čatyroch hadoŭ pazbaŭleńnia voli. Sud prachodziŭ za začynienymi dźviarami. Mahiloŭski abłasny sud zatym adchiliŭ kasacyjnuju skarhu Mocnaj.
Pra skaračeńnie terminu źniavoleńnia paviedamiła kaardynatar arhkamiteta pa stvareńni partyi «Biełaruskaja chryścijanskaja demakratyja» Taisija Kabančuk. «Sprabuju skaracić svoj termin. Hod źniali. Chutka ŭ mianie zamiena režymu, ale ja na heta nie spadziajusia, tut hetaha nie praktykujuć. Napieradzie UDV (umoŭna-daterminovaje vyzvaleńnie), kali nie budzie nijakich zaŭvah», — začytała Kabančuk atrymany ad Mocnaj list.
Mocnaja taksama paviedamlaje, što joj pišuć usie jaje dzieci — i bijałahičnyja, i pryjomnyja. «Dzieci pišuć, za vyklučeńniem tych, jakich zabrali. Ich listy vielmi dapamahajuć mianie», — śćviardžaje žančyna. «Kładusia i ŭstaju z bolem. Žyćcio prajšło, časam dumaju, što darma, a potym pačynaju dumać pra dziaciej i prychodžu da vysnovy, što heta toje, dziela čaho treba žyć. Voś dziela hetaha ja žyvu», — adznačaje jana ŭ svaim liście.
«Ja vyžyvu, usio vyniesu i ŭsio pieražyvu. Chacia byli dumki roznyja spačatku. Žyćcio svajo, navat kali daviadziecca pačynać spačatku, nie raźmianiaju na ślozy i zabivańnie siabie. Stanu ščaślivaj na złość voraham i na radaść siabram, rodnym i tym, chto mianie lubić i viedaje», — piša Mocnaja.
Jana vykazvaje padziaku ŭsim, chto pamiataje pra jaje i dapamahaje, navat prosta dasyłajučy listy ci paštoŭki. «My joj hrošy źbirali i pasyłali, jana i za heta taksama vykazvaje padziaku», — skazała Kabančuk.
Sprava pryjomnaj siamji Iryny Mocnaj nabyła vialiki hramadski rezanans letaś, kali Klimavicki rajvykankam pazbaviŭ žančynu prava apieki nad pryjomnymi dziećmi. Heta adbyłosia paśla samahubstva jaje muža Viktara, jaki byŭ znojdzieny paviešanym 6 červienia 2014 hoda ŭ Minsku. Jon naviedvaŭ pryjomnuju dačku, jakaja vučycca ŭ stalicy.
25 lipienia 2014 hoda Mocnaja była zatrymanaja milicyjaj. Razam ź joj z vykarystańniem siły byŭ zatrymany jaje rodny 19-hadovy syn Vital, na jakoha nadzieli naručniki. Pryjomnych dziaciej dastavili ŭ dziciačy dom. Žančyna nie pahadziłasia z takim rašeńniem uład, źviartałasia ŭ roznyja instancyi z prośbaj dazvolić i dalej vychoŭvać siemiarych dziaciej.
U kancy žniŭnia 2014 hoda orhany śledstva ŭ Klimavičach raspačali spravu ŭ dačynieńni da Mocnaj na padstavie art. 176 KK (złoŭžyvańnie pravami apiekuna). Paśla sprava papoŭniłasia jašče dvuma składami, praduhledžanymi č. 2 art. 154 (katavańnie, učynienaje da niepaŭnaletniaha) i č. 1 art. 183 (abmiežavańnie asabistaj voli čałavieka) KK. U śniežni 2014 hoda sud pryznaŭ byłuju pryjomnuju maci Irynu Mocnuju vinavataj va złoŭžyvańni pravami apiekuna i pryhavaryŭ da čatyroch hadoŭ pazbaŭleńnia voli. 5 sakavika 2015 hoda Mahiloŭski abłasny sud adchiliŭ skarhu Mocnaj na pryhavor
U 2014 hodzie Mocnaja taksama była pryznanaja vinavataj u administracyjnym pravaparušeńni (samaŭpraŭstva) i aštrafavanaja na 750 tys. rubloŭ.
U červieni 2015 hoda były pryjomny syn Mocnaj 17-hadovy Alaksandr Puhačoŭ byŭ znojdzieny paviešanym u pakoi internata ŭ Minsku.
