Navukoŭcy ekśpierymientalnym šlacham vyznačyli, što amatary vyviešvać u sacyjalnych sietkach «hłybakadumnyja» vysłoŭi na fonie piejzažaŭ majuć nizki ŭzrovień intelektu i čaściej vierać u paranarmalnyja źjavy i teoryi zmovy.
favim.com
Jak piša Daily Mail, daśledavańnie na dadzienuju temu apublikavanaje ŭ časopisie Judgment and Decision Making.
U artykule «Ab usprymańni i raspaznańni psieŭdamudraha hłupstva» psichołahi pasprabavali adkazać na pytańnie, ci źjaŭlajucca adny ludzi bolš usprymalnymi da natchnialnych cytat, čym inšyja. Jany pakazvali 845 dobraachvotnikam «hłybokija» dumki («Ty mocny nastolki, nakolki mocny tvoj nastupny chod», «Pasiarod ruchu i chaosu zachoŭvaj spakoj unutry siabie»), znojdzienyja ŭ internecie i zhienieravanyja vypadkovym čynam (na admysłovym sajcie). Da takich dumak byli dadadzienyja vidavočnyja śćviardžeńni (naprykład, «novanarodžanym treba nadavać asablivuju ŭvahu», «bolšaści ludziej padabajecca muzyka»).
Akazałasia, što fiktyŭnyja (zhienieravanyja kampjutaram) i realnyja natchnialnyja cytaty ŭdzielniki daśledavańnia nie adroźnivajuć, i ŭsim im stavili prykładna adnolkavyja adznaki pa škale «hłybinia dumki» (vysokija ŭ paraŭnańni z acenkami tryvijalnych vykazvańniaŭ). Dalej usie ŭdzielniki ekśpierymientu prajšli sieryju psichałahičnych testaŭ i zapoŭnili ankietu z pytańniami ab ułasnych vieravańniach.
Amataraŭ «hłybakadumnych cytat» (jakija dali im vysokuju acenku) akazałasia prykładna 27%. Vyśvietliłasia, što ŭsie jany «nie schilnyja da refleksii, horš ličać, pavolniej dumajuć i vyrašajuć zadačy, čaściej prytrymlivajucca relihijnych vieravańniaŭ i zababonaŭ, schilnyja da viery ŭ suśvietnuju zmovu».
