4 śniežnia nabyŭ zakonnuju moc pryhavor u dačynieńni da niepracujučaha žychara Baranavickaha rajona za intymnuju suviaź ź dziaŭčynkaj-padletkam.
Jak paviedamiŭ staršy prakuror adździeła prakuratury Bresckaj vobłaści Hienadź Bury,
u vieraśni 2012 hoda 32-hadovy mužčyna sustreŭ na dyskatecy ŭ svajoj vioscy 14-hadovuju adnaviaskoŭku i prapanavaŭ joj pakatacca na aŭtamabili. Na ŭskrainie vioski jon spyniŭ mašynu i ŭstupiŭ ź dziaŭčynkaj u intymnyja adnosiny. Sa słoŭ asudžanaha i paciarpiełaj, heta adbyłosia pa ŭzajemnaj zhodzie.
U kancy maja 2013 hoda niepaŭnaletniaja viaskoŭka naradziła dačku i nikomu nie havaryła, chto baćka dziciaci.
Kryminalnaja sprava ŭ dačynieńni da mužčyny była raspačataja paśla taho, jak u lipieni 2015 hoda paciarpiełaja raskazała ab usim svajoj maci. U chodzie rasśledavańnia ŭstanoŭlena, što jon źjaŭlajecca bijałahičnym baćkam dziciaci.
27 kastryčnika 2015 hoda sud Baranavickaha rajona i horada Baranavičy pryznaŭ mužčynu vinavatym pa č.1 art. 168 KK (pałavyja znosiny z asobaj, jakaja nie dasiahnuła 16-hadovaha ŭzrostu) i pryhavaryŭ da dvuch hadoŭ pazbaŭleńnia voli ŭ kałonii strohaha režymu, a taksama da štrafu ŭ 200 bazavych vieličyń (36 młn. rubloŭ).
U sudovym pasiadžeńni abvinavačvany nie pryznaŭ svajoj viny i zajaŭlaŭ, što nie viedaŭ, kolki hadoŭ adnaviaskoŭcy.
4 śniežnia sudovaja kalehija pa kryminalnych spravach Bresckaha abłasnoha suda pakinuła bieź źmianieńnia asnoŭnaje pakarańnie ŭ vyhladzie pazbaŭleńnia voli, vyklučyŭšy pa pratestu prakuratury dadatkovaje — štraf, jaki nie byŭ praduhledžany hetym artykułam kryminalnaha kodeksa na momant učynieńnia złačynstva.
Raniej mužčyna byŭ šeść razoŭ sudzimy, u tym liku za narkotyki, machlarstva, uhon aŭtamabila i kradziež.
