Rublovyja depazity ŭ bankaŭskaj sistemie źnižajucca, pakolki va ŭkładčykaŭ siońnia niama vialikaj matyvacyi zachoŭvać źbieražeńni ŭ nacyjanalnaj valucie. Takoje mierkavańnie vykazaŭ člen praŭleńnia adnaho z kamiercyjnych bankaŭ.
Fota Vadzima Zamiroŭskaha
Kamientujučy pryčynu pastajannaha adtoku rublovych układaŭ u apošnija miesiacy, top-mieniedžar banka źviarnuŭ uvahu, što siońniašnija ŭmovy raźmiaščeńnia depazitaŭ nie zdajucca nasielnictvu pryvabnymi.
«Raniej ludzi kanviersavali zamiežnuju valutu ŭ rubli, pakolki heta było vielmi vyhadna. Siońnia, kali staŭki źnizilisia, rublovy depazit pierastaŭ być instrumientam chutkaha prymnažeńnia srodkaŭ», — adznačyŭ bankir.
Akramia taho, pavodle jaho słoŭ, źnižeńnie abjomaŭ układaŭ abumoŭlenaje adnosna vysokaj spažyvieckaj aktyŭnaściu nasielnictva.
«Zarpłaty ŭ krainie ŭžo praciahły čas nie rastuć. U toj ža čas spažyvańnie siońnia značna vyšejšaje, čym dachody. Adbivajecca siezonny faktar — kožny tydzień mahaziny pravodziać «čornyja piatnicy». U śniežni takaja situacyja zachavajecca — spažyvańnie zastaniecca na vysokim uzroŭni, ludzi buduć uvieś miesiac kuplać padarunki da Novaha hoda», — miarkuje top-mieniedžar.
Źnižeńnie rublovych układaŭ u listapadzie, ličać bankiry, było abumoŭlenaje ŭ tym liku tym, što nabyŭ moc dekret № 7. U adpaviednaści ź im usie ŭkłady ŭ krainie byli padzielenyja na adzyŭnyja i biezadzyŭnyja — apošnija nasielnictva nie moža zabrać z banka da zakančeńnia terminu raźmiaščeńnia hrašovych srodkaŭ.
«My čakali paśla hetaha peŭny adtok układaŭ nasielnictva, aceńvali jaho ŭ 10% da resursnaj bazy bankaŭ, heta značyć 3 trłn. rubloŭ. Da hetaha času adtok adbyŭsia na tryljon rubloŭ, a ŭkłady ŭ zamiežnaj valucie źnizilisia ŭsiaho na 60 młn. dołaraŭ pry ich ahulnym abjomie 8 młrd. dołaraŭ», — apisaŭ situacyju paśla nabyćcia mocy dekretam pieršy namieśnik staršyni praŭleńnia Nacbanka Taras Nadolny, vystupajučy 3 śniežnia ŭ parłamiencie.
Pradstaŭniki kamiercyjnych bankaŭ paćvierdzili, što adtok układaŭ u listapadzie nasiŭ płaŭny charaktar i vialikaha ažyjatažu siarod nasielnictva dekret № 7 nie vyklikaŭ. «Masava, kab ludzi išli zabirać układy, — niama takoha», — padkreśliŭ surazmoŭca.
