Vakoł Ministerstva abarony Ukrainy śpieje čarhovy skandał ź viedamasnymi ŭznaharodami: vajskoŭcy, jakija prachodziać słužbu ŭ zonie ATA, stali atrymlivać pamiatnyja nahrudnyja znaki «Abaroncu Ukrainy» i vyjavili, što na ich namalavany rasijski sałdat ź vintoŭkaj «Vintarez» i tankam T-90.
Publična pytańnie było ŭźniataje ŭčora vałancioram R. Sinicynym:
«Namieśnik ministra abarony Husieŭ Juryj Vienijaminavič uznaharodziŭ bajcoŭ u zonie ATA «pamiatnymi znakami», na jakich sałdaty adrazu paznali rasijski asnoŭny bajavy tank T-90 «Uładzimir» (nie staić na ŭzbrajeńni va ŭkrainskaj armii) i postać z rasijskaj vintoŭkaj VSS «Vintarez» (nie pryniata na ŭzbrajeńnie ŭkrainskaj armii). Sałdaty z zony ATA prosiać pieradać pavažanamu namieśniku ministra, što jany jaho žart z hetym značkom acanili, i prosiać apublikavać fota, kab paržali i astatnija».
Minabarony Ukrainy bližej da poŭnačy vystupiła z hnieŭnym adkazam:
«Kiraŭnictva Ministerstva abarony Ukrainy kateharyčna abviarhaje infarmacyju, jakaja była apublikavanaja ŭ ŚMI pra nibyta vyjavu na Pamiatnym nahrudnym znaku «Abaronca Ukrainy» simvoliki Rasijskaj Fiederacyi.
Tłumačym hramadskaści nastupnuju infarmacyju. Ukazany Pamiatny nahrudny Znak byŭ vyrableny z nahody śviatkavańnia Dnia Uzbrojenych Sił Ukrainy. Na Znaku — dziaržaŭnaja simvolika krainy: Dziaržaŭny Ściah Ukrainy, Znak Ministerstva abarony Ukrainy, taksama namalavany vyšyty ručnik, jak simvał mocnaj ukrainskaj siamji.
Na pamiatnym nahrudnym znaku źmieščany zborny vobraz mužnaha voina — abaroncy Ukrainy. Taksama na Pamiatnyja nahrudnym znaku znachodzicca tank T-72 z charakternymi prykmietami: katkami, husienicaj, korpusam, a taksama 125 mm tankavaj harmataj, jak viadoma, tank T-72 znachodzicca na asnaščeńni Uzbrojenych Sił Ukrainy. Pobač z tankam vyjava vajskoŭca Uzbrojenych Sił Ukrainy vojskaŭ śpiecyjalnaha pryznačeńnia, jaki ekipiravany i apranuty ŭ formu ŭzoru Uzbrojenych Sił Ukrainy, u rukach vajskoŭca zbroja, jakaja majecca na ŭzbrajeńni ŭ padraździaleńniach śpiecyjalnaha pryznačeńnia i raźviedki ŭkrainskaha ajčynnaha viedamstva.
Vajskoŭcy Minabarony aburanyja paklopnickimi publikacyjami, jakija tyražujucca ŭ apošni čas u niekatorych ŚMI pra nibyta vyjavu na Znaku simvoliki Rasii. Takaja infarmacyja raźmiaščajecca napiaredadni śviata z metaj dyskredytacyi VSU, apahańvańnia aŭtarytetu kiraŭnictva abaronnaha viedamstva i demaralizacyi asabovaha składu. Inicyjatary raźmiaščeńnia i raspaŭsiudžvańnia paklopnickich publikacyj dziejničajuć z metaj padryvu davieru hramadstva da Uzbrojenych Sił Ukrainy».
Adnak adzin z vałancioraŭ, jakija zajmajucca pastaŭkami ryštunku častkam śpiecyjalnaha pryznačeńnia VSU, śćviardžaje, što VSS «Vintarez» nijak nie moža być simvałam armii Ukrainy:
«Mianie nie tak źniervavaŭ lap z novym uznaharodnym značkom, jak nizaść ŭ aficyjnym adkazie-«asprečańni» MA… Takim čynam, nie budu ničoha kazać pra tank, nie raźbirajusia… nakaleńniki, bałakłava, pachvinnaja plita na broniku i viadoma ž — lehiendarny VSK. Što z hetaha źjaŭlajecca «simvałam» ŭkrainskaha hieroja? Ničoha!
Tak, sapraŭdy, VSK abo Vintarez u mizernych kolkaściach jość u našych śpiecsłužbach, ale z-za adsutnaści BK praktyčna nie vykarystoŭvajecca. Dy i kali kazać pra simvały, to hety stvoł sapraŭdy staŭ znakam rasijskaj interviencyi, bo mienavita heta zbroja źjaŭlajecca samaj prykmietnaj i charakternaj u varožych śpiecoŭ».
