Turcyja źjaŭlajecca asnoŭnym pakupnikom nafty ŭ ekstremisckaj hrupoŭki «Isłamskaja dziaržava», zajavili pradstaŭniki ministerstva abarony i rasijskaha hienštaba na bryfinhu ŭ Maskvie.
Zhodna z rasijskimi vajennymi, u handal ź ID uciahnutyja asabista prezident Turcyi Redžep Taip Erdahan i jaho siamja.
Jak zajaviŭ pradstaŭnik hienštabu Alaksandr Rudskoj, bajeviki ID majuć 8,5 tys. naliŭnych hruzavikoŭ, jakija transpartujuć kala 200 tysiač barelaŭ nafty ŭ dzień pa troch maršrutach. Pry hetym, pavodle słoŭ Rudskoha, cysterny svabodna pierasiakajuć miažu pamiž Turcyjaj i Siryjaj ŭ niekalkich punktach.
Prybytak džychadzistaŭ ad handlu enierharesursami ŭ rasijskim minabarony aceńvajuć u 2 młrd dalaraŭ u hod.
AFP
«Na zdymku, zroblenym 13 listapada ŭ rajonie nasielenaha punkta Azas, na aŭtamabilnaj darozie, jakaja złučaje Turcyju i Siryju, možna vyrazna nazirać skapleńnie aŭtamabilnaj techniki, jakaja pieravozić naftapradukty», — paviedamiŭ Rudskoj na bryfinhu, demanstrujučy fotazdymak kałony hruzavikoŭ.
«Asnoŭnym spažyŭcom hetaj kradzienaj ŭ zakonnych haspadaroŭ — Siryi i Iraka — nafty źjaŭlajecca Turcyja. Pavodle našych dadzienych, u hety złačynny biznes uciahnutaje vyšejšaje palityčnaje kiraŭnictva krainy — prezident Erdahan i jaho siamja», — zajaviŭ inšy ŭdzielnik bryfinhu, namieśnik ministra abarony Rasii Anatol Antonaŭ.
«My viedajem canu słovam Erdahana […] Nie syduć u adstaŭku kiraŭniki, u pryvatnaści, spadar Erdahan, i ničoha nie pryznajuć, navat kali ich asoby buduć zapeckanyja zładziejskaj naftaj», — dadaŭ Antonaŭ.
