Siońnia a 9:20 kiroŭca BMW nie spraviŭsia z kiravańniem i źbiŭ druhoha kiroŭcu, jaki vyjšaŭ sa svajoj mašyny.
Jak paviedamiła karespandentu Onliner.by staršy inśpiektar DAI Maskoŭskaha rajona Luboŭ Trapaška, DTZ adbyłosia na ŭjeździe ŭ Minsk pa trasie R1 (Minsk — Dziaržynsk — padjezd da trasy M1). Supracoŭniki DAI Maskoŭskaha rajona Minska pieršymi prybyli na vyklik.
«Kiroŭca aŭtamabila Volkswagen Touran ruchaŭsia z boku Fanipala ŭ Minsk. Nie dajazdžajučy mietraŭ 50 da byłoha «bresckaha pasta», jon spyniŭsia na ŭzbočynie i vyjšaŭ z mašyny. I litaralna ŭ hety ž momant mužčynu źbiŭ aŭtamabil BMW, jaki jechaŭ u hetym ža kirunku», — raspaviała Luboŭ Trapaška.
Paciarpieły 47-hadovy mužčyna na momant prybyćcia DAI byŭ nieprytomnym. Vyklikali chutkuju, ab stanie kiroŭcy pakul ničoha nie paviedamlajecca, jość padazreńni na traŭmu nahi.
Kiroŭca BMW rastłumačyŭ inśpiektaram, što, nabližajučysia da hetaha miesca, straciŭ kiravańnie aŭtamabilem. Mašynu stała nasić z boku ŭ bok, jon źbiŭ čałavieka, źjechaŭ za miežy prajeznaj častki ŭ kiuviet i tolki tam siarod dreŭ spyniŭsia. Kiroŭcu 29 hadoŭ.
«Jość imaviernaść, što vadziciel nie vybraŭ biaśpiečnuju chutkaść ruchu z ulikam rezkaj źmieny ŭmoŭ nadvorja. Huma na jaho aŭtamabili zimovaja», — adznačyła Luboŭ Trapaška.
U Minsku pad ranicu pajšoŭ śnieh. Darožniki papiaredžvali: darohi prybirajuć i pasypajuć, ale niemahčyma heta zrabić ŭsiudy i adrazu. DAI rekamienduje kiroŭcam źnizić chutkaść i pavialičyć dystancyju.
