Jołačnyja cacki z roznych krain śvietu pradstaŭlenyja na vystavie «Muziej jołačnych cacak», paviedamili ŭ Nacyjanalnym histaryčnym muziei Biełarusi.
Ekspazicyja pabudavana pa pryncypie čaradziejnaha łabirynta, u jakim pradstaŭlena historyja vytvorčaści šklanych jołačnych cacak ź siaredziny XIX stahodździa da našych dzion. Na vystaŭcy pradstaŭleny cacki ź Jeŭropy, Azii, Aŭstralii, Amieryki i Afryki, anałahaŭ niekatorych ź ich niama ni ŭ adnym jeŭrapiejskim muziei.
Naviedvalnikaŭ urazić nie tolki padbor ekspanataŭ. U haściej budzie mahčymaść ubačyć maleńki cud — praces vyrabu šklanoj jołačnaj cacki.
Vyklikajuć cikavaść rarytetnyja ekspanaty: dakładnaja kopija cacki, padoranaj Papie Rymskamu Iaanu-Paŭłu II, i zaniesienaj u Knihu rekordaŭ Hiniesu, vializny šklany šar ź Vienskaha balu i mnohaje inšaje.
U ekspazicyi pradstaŭleny kopii karcin Marka Šahała, Ivana Šyškina, Salvadora Dali, Pabła Pikasa, Viktara Vaśniacova, Ivana Ajvazoŭskaha, Leanarda da Vinčy, adlustravanyja na šklanych šarach. Taksama možna pahladzieć na vialikuju kalekcyju Dziadoŭ Marozaŭ i interaktyŭny minijaciurny kaladny haradok.
U čas raboty vystaŭki «Muzieja jołačnych cacak» pravodziacca majstar-kłasy dla školnikaŭ: možna razmalavać jołačnuju cacku svaimi rukami i zabrać jaje z saboj u śviatočnaj upakoŭcy. Taksama arhanizavana «Pošta Dzieda Maroza», dzie možna adpravić vinšavalnuju paštoŭku svaim siabram i blizkim. Dzieci ž zmohuć nakiravać svaje pažadańni ab navahodnim padarunku Dziedu Marozu.
Naviedaŭšy vystaŭku, kožnaje dzicia zmoža akunucca ŭ čaradziejnuju kazku, a darosły — viarnucca ŭ dalokaje dziacinstva. Vystava ŭžo ekspanavałasia ŭ minułym hodzie i sabrała rekordnuju kolkaść naviedvalnikaŭ: bolš za 30 tysiač čałaviek. Jak adznačyli ŭ muziei, prajekt budzie pracavać da 17 studzienia budučaha hoda.
