Ilustracyjnaje fota Siarhieja Hudzilina.
U Biełarusi abmiarkoŭvajuć šlachi raźvićcia turyzmu, u pryvatnaści, i ahrasiadziby. Pieršapačatkova ŭsio było pravilna prydumana i vykonvałasia ŭ intaresach dziaržavy i hramadzian, ale ahrasiadziby jak hryby stali vyrastać i ŭ katedžnych zabudovach. Jak vynik, pieršapačatkovaja zaduma spustašajecca, kamiersanty sprabujuć vykarystoŭvać peŭnyja lhoty, jakija jość u haspadaroŭ ahrasiadzib, nie źviartajučy ŭvahi na prablemy zabudoŭščykaŭ.
Jak prykład, infarmacyja ab takoj ahrasiadzibie ŭ adnym z haradoŭ-spadarožnikaŭ Minska. Ahrasiadziba abniesiena vysokim sucelnym płotam, a treba zabiaśpiečyć 70% prazrystaści z susiednim nadziełam. Tyłavy prajezd, što dla padjezdu pažarnych mašyn, inšaj techniki MNS, traktaroŭ z pryčepam hnoju, droŭ, vyvazu śmiećcia, zrobleny tupikovym, pierakryty ziemlanym vałam, staŭ miescam stajanki aŭtamabilaŭ haściej. Apošnija pakul źjaŭlajucca tolki ŭ vychadnyja, kali na susiednich nadziełach adpačyvajuć žychary.
Ciapier pra inžyniernyja kamunikacyi: nie raźličanyja jany na praźmiernaje spažyvańnie vady, elektryčnaści, a mahčyma, i hazu. Elektraenierhii pa techničnych umovach vydzialajecca da 3 kVt pa mahutnaści, a adzin sučasny elektračajnik spažyvaje da 2 kVt. Kuchnia dla pary dziasiatkaŭ haściej, plus duš, inšyja elektraprybory ŭ dziasiatki razoŭ pieravyšajuć narmatyŭ. Vada ŭ letni pieryjad taksama padajecca ŭ abmiežavanaj kolkaści, pakolki panižeńnie cisku naturalnaje, vodazabornyja sistemy pa ekanamičnych pryčynach nie majuć reziervaŭ dla padtrymańnia dazvolenych abjomaŭ da addalenych spažyvalnikaŭ.
Vyvaz śmiećcia vyznačajecca pa ŭsiarednienych pakazčykach u raźliku na adnaho čałavieka. Ahrasiadziby buduć padymać hety pakazčyk za košt nadziełaŭ z žycharami. Ziamla pad zabudovu vydzialajecca tolki dla taho, kab na joj žyć, inšaha Ziamielny kodeks nie praduhledžvaje.
Čamu ahrasiadziby źjavilisia, a cyrulniu abo ramont abutku, adzieńnia nielha stvarać na ŭčastkach? Viadoma, u płanie hienieralnaj zabudovy ŭsio, što treba čałavieku, praduhledžana, vydzielenaje śpiecyjalnaje miesca, i heta narmalna.
Viadoma, najbolš pryvabnymi vyhladajuć zacišnyja, addalenyja ad nasielenych punktaŭ ahrasiadziby, da jakich niaprosta pravieści inžyniernyja kamunikacyi. Dyk voś, kab stymulavać ukaranieńnie dasiahnieńniaŭ navuki i techniki i spraścić schiemu padatkaabkładańnia, prapanuju nie prydumlać padatkovych ilhot, a dosyć vyličvać z hetych padatkaŭ na karyść ahrasiadzibaŭ košt vady ŭ zaležnaści ad kolkaści turystaŭ u čałavieka-dniach z raźliku, skažam, 140 litraŭ na dzień, pa canie heta 9 tys./m3, elektryčnaść pa 150 kVt/hadzinu z raźliku na turysta za miesiac, anałahična pa śmiećci, vypracavać normy i ceny na haz. Treba stymulavać źjaŭleńnie na ahrasiadzibach soniečnych batarej, vietrakoŭ i inšych raspracovak vučonych-praktykaŭ.
A što da zakanadaŭstva, to treba adychodzić ad takich zakonaŭ, jakija patrabujuć śpieckantrolu, treba, kab pracavaŭ pryncyp samakantrolu, adzin zakon aŭtamatyčna kantraluje druhi zakon, tady nie patrebnaja budzie ahramadnaja armija kantraloraŭ, jakaja i sparadžaje karupcyju.
