Kaleha napisaŭ u fejsbuku: «Usio minie i zabudziecca, ale toje, što nivodny z maich siabroŭ u FB nie źmianiŭ avatarku z nahody ab terakcie ŭ rasiejskim Airbus A321 rejs 9268 – ja budu pamiatać. Žałosť iźbiratielna».
Pra što heta? Pra toje, što kaleha budzie biaźlitasna pamiatać kožnaha, chto nie źmianiŭ avatarku? Heta žart? Ci ŭsio nastolki surjozna ŭ fejsbuku, usio pa hamburskim rachunku, nia toje, što ŭ žyćci? «Nie źmianiŭ avatarku»…
Pad pastom inšaha kalehi, jaki pryznaje «racyju Brejvika», staviać łajki ludzi z tvarami, pakrytymi francuskim ściaham. Tyja, što takim čynam vykazali salidarnaść (taki, zdajecca, sens ściahoŭ na avatarcy) z achviarami barbaraŭ, uchvalajuć adnačasova samo barbarstva. Zmahajucca z multykulturalizmam. Adzinaja tut mahčymaja lohika – durnaja Eŭropa zabłukała ŭ svaich talerancyjach i ciapier płacić za heta achviarami, a my, razumnyja, joj, viadoma ž, spačuvajem, ale katory raz nastojliva ŭkazvajem na pryčynu biady – para skančać z multykulturalizmam i, samo saboj, z hiej-paradami dy inšymi nieprymalnymi dla nas rečami.
Fejsbuk poŭny razvah i ŭkazańniaŭ, što rabić i čaho nie rabić Eŭropie. U kantekście heta – biezumoŭnaje pryznańnie za Eŭropaj roli «pieradavoha atradu» cyvilizacyi, bo ŭsio, što ŭ śviecie raźvivajecca, raźvivajecca tam, my tolki pierajmajem, dyj žyvuć tam va ŭsich sensach lepiej za inšych, za nas. Adsiul i naša «pristrastije». Eŭropu krytykujuć, bo «bierahuć sabie», jak maru, jak budučyniu dla ŭłasnaj krainy. Nichto ž nia ŭkazvaje Rasiei, što joj rabić, aproč chiba pažadańnia razvalicca)). I nichto nie razvažaje nad unutranaj lohikaj «isłamskaj dziaržavy» – jak by joj treba było siabie pavodzić, aproč chiba pažadańnia zhinuć.
Hetak kali ŭ ciomnym zavułku hopnik atakuje intelihienta, nichto nie razvažaje pra pavodziny hopnika, usio j tak jasna, zatoje intelihient pačuje mnostva paradaŭ, jak baranicca i mnostva abrazaŭ, što hetych paradaŭ nie pasłuchaŭsia.
Tolki Eŭropie našy parady – nia bolš za źmienienyja avatarki. Pa vialikim rachunku, Eŭropa niasie za nas adkaznaść, a nia my za jaje. Heta jana namahajecca razhledzieć u nas intelihienta i ŭratavać ad hopnika ŭ ciomnym zavułku, ale bačyć čaściakom hopnika, jaki ŭ ciomnym zavułku natyknuŭsia na inšaha hopnika.
Nasupierak presinhu hopnickaha režymu, Eŭropa akazvaje vielizarnuju dapamohu niezaležnaj dumcy i kultury ŭ Biełarusi. A ŭ adkaz atrymlivaje litaść na avatarkach i hopnickija ŭkazańni, jak joj, Eŭropie, žyć i što rabić.
Jana budzie i žyć i rabić toje, što zaŭsiody. Ničoha nie źmianiłasia ŭ jaje cyvilizacyjnym ruchu, jaki jašče ŭ 1921 hodzie apisaŭ biełaruski myślar Ihnat Abdzirałovič. Tupikovyja šlachi raźvićcia (kamunizm, fašyzm) Eŭropa marhinalizuje (nie źniščaje), jak labaratornyja prykłady niaŭdałych złučeńniaŭ, adbirajučy dla mejnstrymu toje, što viadzie da raźvićcia materyjalnaha i intelektualnaha dabrabytu ŭsich. Časam joj davodzicca spłočvać za heta bolšyja achviary, jak u pieršuju i druhuju suśvietnyja vojny, časam mienšyja – ad teraryzmu. Ale ŭrešcie pazytyŭny šlach pieramahaje i zastajecca niaźmiennym.
Ničoha nie źmianiłasia i ŭ charaktary apisanaj Abdzirałovičam Rasiei, jakaja abiraje tolki adzin niejki šlach, pryčym niavažna, perspektyŭny ci tupikovy, a ŭsio inšaje biaźlitasna źniščaje, praz što luby perspektyŭny šlach taksama robicca tupikovym.
Eŭropa niasie achviary mienavita na šlachu lepšaha ŭładkavańnia śvietu i achviary hetyja spryčyniaje joj mienavita barbarstva i hapata. Eŭropa – heta toj intelihient, jaki navučaŭsia ŭ ciomnym zavułku stavić hopnika na miesca. I niebiespaśpiachova. Tak budzie i ciapier.
Z nami što budzie – pytańnie. Pra heta i varta było b raicca-dumać.
Bo našy «avatarki litaści» – niemiłasernyja i biessensoŭnyja – zastanucca ŭ suśvietnym siecivie ŭ tym samym košyku dla śmiećcia, što i pryznańnie «racyi Brejvika».
