Premija imia Andreja Sacharava «Za svabodu dumki» 2015 prysudžana błohieru z Saŭdaŭskaj Aravii Raifu Badavi, jaki znachodzicca ŭ turmie pa abvinavačvańni ŭ abrazie isłamu. Pra heta abviaściŭ u Strasburhu ŭ čaćvier, 29 kastryčnika, Jeŭrapiejski parłamient.
U 2012 hodzie Badavi byŭ aryštavany i prysudžany da 10 hadoŭ turmy, hrašovaha štrafu, a taksama 1000 udaraŭ bizunom. Pieršyja 50 udaraŭ jon pieranios u studzieni. Paśla žorstkaj krytyki z boku mižnarodnaj supolnaści praciah cialesnaha pakarańnia byŭ adkładzieny, pavodle aficyjnaj viersii — z-za stanu zdaroŭja źniavolenaha. Ale vykanańnie hetaj častcy prysudu ŭ dalejšym nie vyklučana. Niajasna taksama, ci budzie pierahledžany prysud.
Akramia Badavi, u šort-list premiju imia Sacharava 2015 byli ŭklučanyja rasijski apazicyjny palityk Barys Niamcoŭ, zabity ŭ Maskvie 27 lutaha, a taksama demakratyčnaja apazicyja Vieniesueły, pradstaŭlenaja abjadnańniem «Kruhły stoł demakratyčnaha adzinstva» i šerah palitviaźniaŭ.
***
Sacharaŭskaja premija «Za svabodu dumki» była zasnavanaja ŭ 1988 hodzie dla ŭznaharodžańnia ludziej ci hramadskich arhanizacyj, jakija prasłavilisia ŭ spravie abarony pravoŭ čałavieka i asnoŭnych svabodaŭ. Cyrymonija ŭručeńnia pravaabarončaj premii za 2015 adbudziecca 16 śniežnia ŭ Strasburhu.
Siarod biełarusaŭ jaje atrymlivali Biełaruskaja asacyjacyja žurnalistaŭ i Alaksandr Milinkievič.
