Tolki niekalki hadzinaŭ pabyli na vajskovych zborach aktyvisty ź Dziaržynskaha rajonu Mikałaj Kołas i Aleś Rybačenka.
«Narodny schod» 4 kastryčnika 2015 hodu ŭ centry Miensku suprać raźmiaščeńnia rasiejskaj vajskovaj bazy ŭ Biełarusi, ilustracyjnaje fota.
Ranicaj 12 kastryčnika jany zhodna z pozvami prybyli ŭ Dziaržynski kamisaryjat, adkul ich zavieźli ŭ vajskovuju častku SPA ŭ pasiołku Navakołasava. Praź niekalki hadzin aktyvistaŭ adpuścili dadomu, addaŭšy vajskovyja bilety, paviedamiŭ karespandentu Svabody Mikałaj Kołas.
«My nadzieli majki z nadpisam «Nie — rasiejskaj vajskovaj bazie», i hetak siońnia źjavilisia ŭ kamisaryjat. Tam takich, jak my, «partyzanaŭ» było čałaviek dziesiać, u asnoŭnym z Uździenskaha rajonu. Nas usich pasadzili na aŭtobus i advieźli ŭ Navakołasava, u vajskovuju častku SPA. Tam niekalki hadzin pratrymali, ale ŭziali na zbory nia ŭsich — pałovu. Nam z Alesiem viarnuli vajskovyja bilety i adpuścili damoŭ. Skazali, my takija im nie patrebnyja».
Mikałaj Kołas miarkuje, što sproba zabrać jaho i jahonaha siabra Alesia Rybačenku na zbory źviazanaja mienavita ź ichnaj hramadzkaj dziejnaściu.
«Chutčej za ŭsio, nas hetymi zborami chacieli zapałochać, kab ścišyli svaju palityčnuju aktyŭnaść. Pierad vybaram da mianie damoŭ prychodziŭ pažarny, staršynia sielsavietu zvaniŭ, što pryvieźli pozvu ŭ vajenkamat. Pałochali štrafami hetak, što maci daviałosia chutkuju dapamohu vyklikać».
Mikałaj Kołas i Aleś Rybačenka brali aktyŭny ŭdzieł u akcyjach apazycyi, jakija prachodzili pierad vybarami, u tym liku ŭ šeści nacyjanalnaha ściaha 10 kastryčnika i šeści pa praspekcie Niezaležnaści 11 kastryčnika. Jany nieśli raściažku z nadpisam «Bajkot vybaram». Na raniejšych akcyjach na płoščy Svabody jany byli ŭ majkach z nadpisami suprać rasiejskaj vajskovaj bazy.
