Hramadskaje abjadnańnie «Biełaruskaja asacyjacyja žurnalistaŭ» (BAŽ) zaniepakojenaje chakierskaj atakaj na niezaležnyja anłajn-miedyja — belapan.com i naviny.by. Pra heta skazana ŭ zajavie BAŽ u suviazi z DDoS-atakaj na sajty infarmacyjnaj kampanii BiełaPAN, pryniataj 5 kastryčnika.
«Ahresiŭnyja dziejańni suprać hetych sajtaŭ pačalisia paśla publikacyi krytyčnych artykułaŭ ab prymusovaj jaŭcy studentaŭ na palityčnuju akcyju z relihijnaj afarboŭkaj «Malitva za Biełaruś», — adznačajecca ŭ zajavie. — Papiaredni vopyt (błakiroŭka šerahu niezaležnych sajtaŭ u kancy śniežnia 2014 hoda paśla aśviatleńnia kryzisu na valutnym i spažyvieckim rynku) dazvalaje razhladać heta jak sprobu pakarać za vykanańnie prafiesijnych abaviazkaŭ».
BAŽ źviartaje ŭvahu na toje, što «hrubaje ŭmiašańnie ŭ pracu niezaležnych miedyja adbyvajecca padčas elektaralnaj kampanii, kali patrebnaść ludziej u roznabakovaj niepadcenzurnaj infarmacyi jak nikoli vysokaja».
«My ličym heta čarhovaj prajavaj sistemnaj palityki kantrolu nad infarmacyjaj u našaj krainie z metaj manipulavańnia hramadskaj śviadomaściu», — havorycca ŭ zajavie. BAŽ dałučajecca da patrabavańnia kampanii BiełaPAN arhanizavać biaśpiečnaje absłuhoŭvańnie sajtaŭ i abaronu ad lubych zamachaŭ na ich paŭnacennuju pracu.
«HA «BAŽ» zaklikaje spynić lubyja ataki na niezaležnyja miedyja, kab zabiaśpiečyć kanstytucyjnaje prava hramadzian našaj krainy atrymlivać roznabakovuju niepadcenzurnuju infarmacyju z roznych krynic», — padkreślivajecca ŭ zajavie.
Z patrabavańniem spynić błakiroŭku sajtaŭ infarmacyjnaj kampanii BiełaPAN vystupiŭ taksama arhkamitet pa stvareńni partyi «Biełaruskaja chryścijanskaja demakratyja». «Ataka na niezaležnyja ŚMI za tydzień da dnia hałasavańnia padkreślivaje, što ŭ Biełarusi nie adbyłosia nijakich stanoŭčych źmianieńniaŭ na šlachu da demakratyzacyi. Naadvarot, umiašańnie ŭ pracu ŚMI pa-raniejšamu ličycca normaj», — padkreślivajuć pradstaŭniki BCHD.
Chryścijanskija demakraty zaklikajuć mižnarodnyja struktury, u tym liku ABSIE, zafiksavać fakt błakiroŭki sajtaŭ u kantekście praviadzieńnia vybarčaj kampanii. Arhkamitet BCHD taksama zaklikaje ŭłady «nieadkładna raspačać zachady dla zabieśpiačeńnia dostupu hramadzian Biełarusi da resursaŭ».
3 kastryčnika siervier kampanii BiełaPAN źviedaŭ masiravanuju DDoS-ataku, jakaja praciahvajecca dahetul.
