Redaktarka sajta «Chartyja'97» Natalla Radzina nastojvaje, što vykryła schavanych supracoŭnikaŭ KDB, i śćviardžaje, što jany joj pahražajuć.
Abvinavačanyja ŭ supracoŭnictvie sa specsłužbami ŭdzielniki mitynhu 23 vieraśnia na płoščy Svabody aburanyja infarmacyjaj, jakaja źjaviłasia ŭ biełaruskim internecie, i nazyvajuć jaje paklopam. Miž tym hałoŭny redaktar sajta «Chartyja'97» Natalla Radzina nastojvaje, što heta mienavita supracoŭniki specsłužbaŭ.
Mikitu Nahlina i jaho siabroŭku Tamaru Bałakinu ŭ internecie abvinavacili ŭ tym, što jany tak zvanyja «cichary» — supracoŭniki specsłužbaŭ, jakija pracujuć na akcyjach apazycyi ŭ cyvilnym.
Infarmacyja źjaviłasia na charter97.org sa spasyłkaj na supołku ŭ Fejsbuku «Terytoryja pravoŭ». Vydańnie źmiaściła fatazdymki Mikity i Tamary ź mitynhu Mikałaja Statkieviča na płoščy Svabody 23 vieraśnia i na pikiecie Abjadnanaj hramadzianskaj partyi 16 vieraśnia. Pad artykułam źjaviłasia šmat abraźlivych kamentaroŭ.
Dalej «Chartyja» jašče niekalki razoŭ u svaich artykułach uzhadvała Mikitu jak «cichara».
Znajści pieršakrynicu ŭ supołcy «Terytoryja pravoŭ» ciapier užo niemahčyma — imavierna, hetaja infarmacyja była vydalenaja.
«23 vieraśnia ŭ mianie byŭ dzień narodzinaŭ — mnie spoŭniłasia 30 hadoŭ. Hetaje śviata ja vyrašyŭ pravieści na pikiecie Mikoły Statkieviča. Usio było b dobra, ale na nastupny dzień ad spadaryni Radzinaj ja atrymaŭ nie zusim pryjemny «padarunak», jaki možna było nazirać na sajcie «Chartyja'97»», — raspavioŭ radyjo «Svaboda» Mikita Nahlin.
Mikita kaža, što jon pracuje na dziaržpradpryjemstvie, u elektrasietkach, specyjalistam pa suviazi. U jaho vyšejšaja adukacyja — jon skončyŭ Avijacyjnuju akademiju pa specyjalnaści «bortinžyner».
Mikita padkreślivaje, što ŭ publikacyjach u internecie nie pryviedziena nijakich faktaŭ, jakija b śviedčyli, što jon maje niejkaje dačynieńnie da specsłužbaŭ.
«Voś kažuć, što ja šmat pytańniaŭ na mitynhu zadavaŭ… Ja b chacieŭ źviarnucca da palitykaŭ: kali vy ŭžo kličacie narod, svaich słuchačoŭ, to dajcie mahčymaść im skazać i niasicie za heta adkaznaść. A to narod prychodzić, a potym pačynajecca — čamu vy pytańni niazručnyja zadajacie? U mianie takoje razumieńnie, što my pavinny prychodzić pa kvitkach, z hatovymi pytańniami i hatovymi adkazami», — kaža Mikita.
Žančyna na fatazdymku, raspaŭsiudžanym sajtam «Chartyi-97», —Tamara Bałakina — pryjšła na akcyju razam ź Mikitam.
«Mianie na mitynh na płoščy Svabody zaprasiŭ Mikita. Mnie było vielmi cikava pahladzieć i pasłuchać Statkieviča, jakoha tolki vyzvalili z turmy. A ciapier nam dziŭna, što nas abvinavačvajuć u takoj biazhłuździcy, da jakoj my nia majem nijakaha dačynieńnia», — kaža Tamara.
Da hetaha jany razam byli na pikiecie pamiaci Hančara i Krasoŭskaha 16 vieraśnia kala HUMa. Mikita i Tamara taksama źbirajucca pajści na mitynh 4 kastryčnika suprać rasiejskaj vajskovaj bazy.
Mikita padkreślivaje, što dla jaho abvinavačańnie ŭ pracy na specsłužby — heta surjoznaja abraza. Choć tyja, chto viedaje jaho asabista, nie pavieryli ŭ infarmacyju, jakaja źjaviłasia na sajcie «Chartyi'97».
«Ludzi viedajuć, chto ja taki i čym zajmajusia. Na toj ža «Chartyi» pisali kamentary, što tak, sapraŭdy, jon elektryk. Pradpryjemstva vialikaje, kala 1000 čałaviek, i da taho, jak vyzvalili Mikałaja Statkieviča, ja chadziŭ u futbołcy z nadpisam «Svabodu Mikałaju Statkieviču!». Mianie navat kiraŭnictva bačyła ŭ hetaj futbołcy, ale jany ŭsio razumieli — nichto navat słova nivodnaha nie skazaŭ. Pracoŭny klas kazaŭ — małajčyna, trymajsia. Adzin, praŭda, byŭ, chto spytaŭsia: ciabie jašče nie pasadzili?.. A jak tolki ja daviedaŭsia, što Mikołu vypuskajuć, ja ŭsie spravy kinuŭ i pajechaŭ na aŭtavakzał. Ja pastajanna saču za palityčnymi padziejami», — raspavioŭ Mikita.
Mikita i Tamara kažuć, što jany razam chodziać na roznyja imprezy ŭ kniharni «Łohvinaŭ» i ŭ halerei «Ŭ», vučacca na kursach «Mova nanova», a taksama zapisalisia ŭ naziralniki na prezydenckich vybarach ad Partyi BNF.
Mikita Nahlin źviarnuŭsia ŭ kamisiju pa etycy Biełaruskaj asacyjacyi žurnalistaŭ sa skarhaj na sajt «Chartyi'97» i supołku ŭ sacsietkach «Terytoryja pravoŭ», jakaja maje dačynieńnie da pravaabarončaha centru «Viasna».
«Supracoŭnik, jaki pracavaŭ na «Terytoryi pravoŭ», raźmiaściŭ niepravieranuju infarmacyju, jakaja była raspaŭsiudžana «Chartyjaj'97». Jon prosić pryznać, što ŭ hetych publikacyjach utrymlivałasia parušeńnie žurnalisckaj etyki», — skazała karespandentu Svabody sakratarka kamisii pa etycy BAŽ Taciana Raviaka.
Hałoŭny redaktar «Chartyi'97» Natalla Radzina, jakaja ŭciakła ź Biełarusi i atrymała prytułak u Polščy, nastojvaje na tym, što Mikita i Tamara — supracoŭniki biełaruskich specsłužbaŭ.
«Ja absalutna nie razumieju, čamu vas cikavić hetaja tema. Ja mahu skazać tolki adno: ja nie atrymlivała ad hetaha čałavieka nivodnaha dokazu taho, što jon nie źjaŭlajecca supracoŭnikam specsłužbaŭ. Jany ničoha nie dasyłali ni na sajt «Chartyi», ni mnie asabista. Ja ad jaho atrymlivała tolki pahrozy ŭ Fejsbuku. Hetyja pahrozy, u pryncypie, paćviardžajuć, što hety čałaviek — supracoŭnik specsłužbaŭ. I ja maju namier usio heta adpravić u BAŽ.
Akramia taho, ja chaču nahadać, što pieršaj infarmacyju pra toje, što heta supracoŭniki specsłužbaŭ — «cichary» — paviedamiła «Terytoryja pravoŭ». To bok pravaabaroncy, jakija nazirajuć za akcyjami pratestu. Potym jany čamuści vydalili hetuju infarmacyju, ale pieršymi jany jaje raspaŭsiudžvali», — zajaviła Natalla Radzina.
Karespandenty «Našaj Nivy» byli śviedkami, jak Nahlin uvieś čas trymajecca kala lidaraŭ apazicyi na mitynhach i ŭvieś čas lezie ŭ razmovy ź imi. Navat kali jany razmaŭlajuć z žurnalistami.
