29 vieraśnia, aŭtorak, na «Barysaŭ-Arenie» ŭ matčy 2-ha tura hrupavoha raŭndu Lihi čempijonaŭ BATE zhulaje ź italjanskaj «Romaj» (pačatak hulni ŭ 21:45). Hości pryjechali ŭ Barysaŭ biez traŭmavanych Toci, Kiejta, Džeka i Ščensny.
U adsutnaść traŭmavanych Toci, Kiejta, Džeka hałoŭnaj zorkaj «Romy» źjaŭlajecca baśnijec Miralem Pjanič, fota gazetta.it
Hałoŭny trenier BATE Alaksandr Jermakovič na pieradmatčavaj pres-kanfierencyi skazaŭ, što dakładna ŭ matčy nie zhulajuć Vital Radzivonaŭ i Maksim Žaŭnierčyk, paviedamlaje aficyjny sajt biełaruskaha kłuba.
«Ci paŭpłyvaje adsutnaść Toci, Sejdu Kiejta, Džeka, Ščensny na madel hulni «Romy»?», — pacikavilisia žurnalisty.
Jermakovič adkazaŭ, što ŭ «Romy» vielmi dobra pastaŭlena kamandnaja hulnia. «Ad kožnaha futbalista varta čakać pahrozy. Luby moža ŭziać na siabie lidarskija funkcyi, — miarkuje trenier. — U kožnaj linii jość lidary. Toj ža De Rosi dziejničaje i ŭ abaronie, i ŭ paŭabaronie. Vyłučajecca Pjanič».
Jermakovič kaža, što nie baicca hulni: «Treba, kab u chłopcaŭ była hałava na plačach. Jašče raz paŭtaru: my pavinny być hatovymi da ŭsiaho».
Nahadajem, što ŭ pieršym tury, dva tydni tamu, BATE ŭ haściach razhromna prajhraŭ niamieckamu «Bajeru» (1:4), a «Roma» doma zhulała ŭničyju z «Barsiełonaj» (1:1).
