Najbujniejšaja dziaržaŭnaja hazieta krainy vyjšła z zaklikam «Tvoj hołos nužien Biełarusi» na pieršaj pałasie.
Łukašenkaŭskaja hazieta na pieršaj pałasie svajho subotniaha numara asudžaje zakliki ihnaravać vybary.
«Jakimi žałasnymi i niepierakanaŭčymi hučać adyjoznyja zakliki niekatorych «palitykaŭ», jakija zaklikajuć u dzień vybaraŭ pajechać da cieščy na bliny ci adasobicca na rybałku. I heta rajać ludzi, jakija zajaŭlajuć ab sabie jak ab zmaharach za demakratyju i zachavańnie pravoŭ čałavieka. Jakaja złaja i niedarečnaja karykatura na vybarčaje prava hramadzian, jakich zbankrutavanyja «palityki» padbuchtorvajuć da nievykanańnia svajho kanstytucyjnaha doŭhu. Jak možna ŭpaści tak nizka, kab vyśmiejvać prava ludziej na vybar svajho šlachu. Nie słuchajcie cyničnych dudaroŭ, hałasujcie», — zaklikaje hazieta.
Susiedničaje artykuł ź intervju ź Siarhiejem Hajdukievičam, dzie toj paviedamlaje, što ŭsie kandydaty sioleta ŭ «roŭnych umovach». A dalej idzie artykuł, u jakim roznaha rodu dziaržaŭnyja słužačyja raskazvajuć, čamu jany pojduć na vybary.
«Biez vašieho hołosa vybory budut niepołnociennymi. Vaš hołos nužien Biełarusi», — zaklikaje prezidenckaja hazieta.
Prezidenckija vybary ŭ Biełarusi adbuducca 11 kastryčnika. Heta nie vybary ŭ jeŭrapiejskim sensie hetaha słova. Niečakanaści na ich vyklučanyja.
Prezident Alaksandr Łukašenka asabista pryznačaje staršyniu Centrvybarkama, jakaja niaźmiennaja z 1996 hoda, choć za hety čas ni adny vybary nie byli pryznanyja svabodnymi i spraviadlivymi naziralnikami ABSIE.
Aparat prezidenta farmiruje ŭsie vybarčyja kamisii. Naziralniki ŭ časie padliku hałasoŭ abaviazany trymacca na takim addaleńni ad stałoŭ ź biuleteniami, što jany ničoha nie bačać.
Usich studentaŭ i rabotnikaŭ abaviazvajuć hałasavać daterminova. Chto b zdahadaŭsia, čamu.
I navat ahitacyja za bajkot pradbačliva zabaronienaja zakonam.
Heta nie «vybary prezidenta», a «vybary Łukašenki», žartujuć biełarusy.
61-hadovy Alaksandr Łukašenka kiruje Biełaruśsiu 21 hod, kraina nie mieła inšych prezidentaŭ, akramia jaho. Jon kiruje krainaj trochi mienš za Nazarbajeva i Karymava i trochi bolš, čym Pucin.
