Kiraŭnik Čačni Ramzan Kadyraŭ zajaviŭ, što zajzdrościć ludziam, jakija zahinuli ŭ čas chadžu ŭ dalinie Mina kala Mieki, pakolki jany pamierli ŭ śviatym dla musulman miescy.
«Jany pamierli ŭ samy śviaty dzień, u samym śviatym dla musulman miescy, tamu jany vielmi ščaślivyja ludzi, my im zajzdrościm. Daj Ałach, kab my ich sustreli ŭ rai», — zajaviŭ jon Ruskaj słužbie navin.
Pa słovach Kadyrava, toje, što zdaryłasia ŭ Minie, možna acharaktaryzavać jak trahiedyju, ale ŭ toj ža čas kožny musulmanin, jaki ździajśniaje chadž u Saudaŭskuju Araviju, maryć pamierci tam.
«Ałach daruje ŭsie hrachi tym, chto pamior, ździajśniajučy chadž. Kožny musulmanin choča ŭbačyć Ałacha. To bok, heta i trahiedyja, i vialiki padarunak ad Usiavyšniaha», — skazaŭ kiraŭnik Čačni.
Ciskanina padčas chadžu ŭ dalinie Mina adbyłasia ŭ čaćvier, u pieršy dzień śviatkavańnia Kurban-Bajrama. U vyniku zahinuli pa mienšaj miery 717 čałaviek, paviedamlaje saudaŭskaja słužba hramadzianskaj abarony ŭ «Tvitary». Jašče 805 čałaviek paciarpieli.
Ciskanina padčas chadžu adbyvajecca ŭ dalinie ŭžo nie ŭ pieršy raz. Zvyčajna heta zdarajecca padčas abradu zakiddańnia kamianiami słupa, simvalizujučaha satanu.
Najbolšaja kolkaść achviar było zafiksavana ŭ 1990 hodzie. Tady zahinuli amal paŭtary tysiačy čałaviek.
Paśla ciskaniny 2006 hoda, u jakoj zahinuła bolš za 300 čałaviek, miesca, dzie pravodzicca rytuał, było istotna rekanstrujavana. U nastupnyja dzieviać hadoŭ surjoznych zdareńniaŭ padčas chadžu nie fiksavałasia.