Biełaruś nie śpiašajecca ŭstupać u SHA, kab nie nanieści škody JEAES. Pra heta siońnia zajaviŭ Alaksandr Łukašenka na II Forumie rehijonaŭ Biełarusi i Rasii ŭ Sočy.
Kiraŭnik dziaržavy źviarnuŭ uvahu, što apošnija damoŭlenaści Kazachstana z SHA, mytnyja pošliny, ab jakich jany damovilisia, stvaryli realnuju prablemu funkcyjanavańnia adzinaha ekanamičnaha sajuza. «My vymušany prystasavacca da taho, što tam nakrucili SHA i Kazachstan. I heta budzie niaprosta, tam panizili pošliny tak, što moža chłynuć pradukcyja na rasijski i biełaruski rynki», — adznačyŭ Łukašenka. Amal usie pramysłovyja pradpryjemstvy traplajuć pad udar, dadaŭ jon.
Biełaruś taksama ŭ svaju čarhu adnaviła pierahavorny praces z SHA. «Ale ŭ hetym vypadku my nie śpiašajemsia ŭstupić u SHA», — zaŭvažyŭ Łukašenka. Na jaho dumku, treba praanalizavać situacyju. «Moža, niaŭdzieł siońnia Biełarusi ŭ SHA nam pryniasie bolšuju karyść, čym ustupleńnie ŭ SHA. Zrazumieła, što nas ciapier buduć «presavać», kab my z boku Biełarusi jašče nižej apuścili mytnyja pošliny, ale heta razburyć uvieś ekanamičny sajuz», — padkreśliŭ jon.
«My spynilisia, akuratna vyvučajem situacyju dla taho, kab nie dapuścić hetych pamyłak, i našy partniory i kalehi pavinny ab hetym viedać», — skazaŭ biełaruski lidar.
