Kazackija atamany zaklikajuć hałasavać na prezidenckich vybarach 11 kastryčnika za Alaksandra Łukašenku. Pra heta havorycca ŭ zajavie, pryniataj 16 vieraśnia na pašyranym pasiadžeńni Rady atamanaŭ Biełarusi.
«Napiaredadni vybaraŭ prezidenta Respubliki Biełaruś u asobnych srodkach masavaj infarmacyi stała źjaŭlacca łžyvaja infarmacyja ab tym, što kazaki pryniali rašeńnie vyłučyć viarchoŭnaha atamana ŭ kandydaty na pasadu prezidenta Respubliki Biełaruś, — havorycca ŭ zajavie. — Heta infarmacyja nie adpaviadaje rečaisnaści. Kazaki Respubliki Biełaruś na Vialikim kole adnahałosna pryniali rašeńnie padtrymać na vybarach hanarovaha viarchoŭnaha atamana Łukašenku. Hetaje rašeńnie moža kamuści padabacca ci nie padabacca, ale heta rašeńnie kazakoŭ, i my budziem bieśpiarečna jamu padparadkoŭvacca».
U zajavie taksama havorycca: «My, kazaki, zaklikajem usich hramadzian našaj krainy abjadnacca i padtrymać na vybarach Alaksandra Ryhoraviča Łukašenku. Spradvieku kazaki Biełarusi słužyli Ajčynie, narodu i viery pravasłaŭnaj! Svaim tradycyjam my nie zdradzim! Zastaniemsia addanymi sałdatami Radzimy i ŭsimi siłami dapamožam prezidentu, viarchoŭnamu hałoŭnakamandujučamu, hanarovamu viarchoŭnamu atamanu Alaksandru Ryhoraviču Łukašenku zachavać mir i stabilnaść na našaj rodnaj biełaruskaj ziamli!»
Jak rastłumačyŭ BiełaPAN kiraŭnik pres-centra Kazactva Respubliki Biełaruś pałkoŭnik Ivan Maščanka, pradstaŭniki kazackich ruchaŭ nie padtrymlivajuć vyłučeńnie Mikałaja Ułachoviča kandydatam u prezidenty.
«Nie mahli padtrymać vyłučeńnie Ułachoviča, tamu što dla taho, kab ataman bałatavaŭsia i zvaŭsia atamanam, jamu nieabchodna rašeńnie koła kazakoŭ ci choć by pasiadžeńnia Rady atamanaŭ. Ni toje, ni druhoje zroblena nie było. Ludziej prosta ŭviali ŭ zman, što viarchoŭny ataman idzie na vybary».
Jon adznačyŭ, što ŭ 1996 hodzie adbłosia abjadnalnaje koła kazackich ruchaŭ i było stvorana Usiebiełaruskaje abjadnanaje kazactva (u jaho ŭvachodzić i ŭznačalenaje Ułachovičam Biełaruskaje kazactva). Kiraŭnikom Usiebiełaruskaha abjadnanaha kazactva i viarchoŭnym atamanam Biełarusi źjaŭlajecca hienierał Mikałaj Jarkovič.
«My b chacieli, kab ludzi viedali, što Alaksandr Ryhoravič (Łukašenka) źjaŭlajecca hanarovym Viarchoŭnym atamanam, i kazaki Biełarusi na Vialikim kole ŭsich kazakoŭ z prysutnaściu taho samaha Ułachoviča pryniali rašeńnie, što buduć padtrymlivać dziejnaha prezidenta», — padkreśliŭ Maščanka.
Pavodle jaho słoŭ, Vialikaje koła Usiebiełaruskaha abjadnanaha kazactva pravodzicca raz na piać hadoŭ. Apošni raz jano źbirałasia 11 listapada 2013 hoda. «My źbirali koła niepasredna dla taho, kab pryniać rašeńnie pa vybarach, — skazaŭ Maščanka. — I ciapier, kali stała pytańnie ab tym, što jon (Ułachovič) daŭ intervju jak viarchoŭny ataman, prajšoŭ razbor. Pryjechali da baciuški, jaki akarmlaje niepasredna heta Biełaruskaje kazactva, udakładnili ŭ jaho, ci było ŭ ich koła».
Maščanka zaznačyŭ, što, pavodle słoŭ hetaha śviatara, koła było try miesiacy tamu i na im pryniali rašeńnie taksama padtrymać Łukašenku. Inšych rašeńniaŭ nie było, tamu Ułachovič uvodzić ludziej u zman śćviardžeńniami, što źjaŭlajecca viarchoŭnym atamanam kazakoŭ, zajaviŭ kiraŭnik pres-centra.
«Jon moh vyłučacca jak hramadzianin, ale nie jak kazak. Kali jon vyłučajecca, skažam, jak viarchoŭny ataman i ŭ jaho niama padtrymki ad kazakoŭ, jon pavinien napisać zajavu, skłaści paŭnamoctvy, jak heta robiać kiraŭniki dziaržavy padčas pieradvybarnaj kampanii, — rastłumačyŭ Maščanka. — A tut, razumiejecie, dziaržava nas pačała bić za toje, što jon pačaŭ davać intervju i ŭ hetych intervju pisać, što jon finansujecca za košt kazakoŭ. A heta nie tak. Biez rašeńnia Savieta atamanaŭ nivodnaje dziejańnie nie moža adbyvacca. My nie chacieli ŭsio heta publikavać da momantu rehistracyi, kab nas nie papraknuli, što my niby tam pieraškadžajem jaho rehistracyi. Ciapier, kali jon zarehistravaŭsia i pačaŭ vieści [ahitacyju], źjaviłasia heta zajava».
Pavodle słoŭ Maščanki, za padobnyja pavodziny Ułachoviča mohuć vyhnać z kazactva.
«Heta adbudziecca paśla taho, jak adbuducca vybary, — skazaŭ jon. — Vy ž zrazumiejcie pravilna, my nie žadajem, kab nas papraknuli ŭ tym, što my hetyja dziejańni chucieńka tam… Tamu i ŭ našaj zajavie nie idzie havorka ab tym, što tam Ułachovič ci Piatroŭ, tam idzie havorka ab tym, što Alaksandr Ryhoravič źjaŭlajecca hanarovym viarchoŭnym atamanam z 2008 hoda. Tamu kazaki naohuł nie majuć prava ŭźnimać heta pytańnie, pakul nie projdzie kruh».
Maščanka zaznačyŭ, što praviadzieńnie kruha płanujecca na 6—7 kastryčnika. «My zajaŭku ŭžo adpravili i kiraŭniku dziaržavy, i administracyi ab tym, što my chočam pravieści kruh. Ale, vy ž viedajecie, moža adbycca tak, što nam prosta skažuć, što nie treba ciapier uźnimać hety vialiki šum, kab vyhnać jaho pierad samymi vybarami, a praviadziom jaho krychu paźniej. Tamu heta nie ad nas zaležyć», — skazaŭ jon.
Uziać kamientar u Mikałaja Ułachoviča ci jaho pradstaŭnika BiełaPAN nie ŭdałosia.
