Minharvykankam pryniaŭ rašeńnie pra «niemetazhodnaść budaŭnictva šmatkvaternych žyłych damoŭ na terytoryi ŭ miežach vulic Kirava, Śviardłova, Uljanaŭskaj, Babrujskaj».
Jak paviedamiŭ kaardynatar hramadskaj kampanii «Hienpłan — dla minčan!» Dzianis Kobrusieŭ, pra heta havorycca ŭ liście ad 8 vieraśnia za podpisam namieśnika staršyni Minharvykankama Viktara Łapcieva. List atrymany inicyjatyŭnaj hrupaj hramadzian, jakaja zmahajecca suprać uščylnieńnia kvartała.
«Adnak, niahledziačy na dasiahnuty pazityŭny vynik, miascovyja žychary praciahvajuć rabić dziejańni, kab u budučyni nie było novych sprob uščylnieńnia hetaj terytoryi», — zaznačyŭ Kobrusieŭ. 14 vieraśnia inicyjatyŭnaja hrupa nakiravała ŭ Minharvykankam i Administracyju prezidenta zvarot z patrabavańniem admianić prajekt detalovaha płanavańnia (PDP) u miežach vulic Kirava — Śviardłova — Uljanaŭskaja — Babrujskaja, zaćvierdžany ŭ 2008 hodzie. Mienavita ŭ PDP była praduhledžanaja mahčymaść uščylnieńnia kvartała.
U zvarocie, jaki padpisali 265 miascovych žycharoŭ, ukazvajecca, što «raźlikovy termin dziejańnia PDP minuŭ i prajektnyja rašeńni nie adpaviadajuć horadabudaŭničaj dakumientacyi vyšejšaha ŭzroŭniu». Taksama adznačajecca nieabchodnaść raspracoŭki novaj horadabudaŭničaj dakumientacyi. «Žychary raźličvajuć, što pry karekciroŭcy PDP budzie ŭličana ich mierkavańnie i mierkavańnie spartyŭnaj hramadskaści i zamiest šmatpaviarchovikaŭ u dvary za «Varotami horada» budzie adkryta spartyŭnaja škoła alimpijskaha reziervu dla dziaciej», — zaznačyŭ Kobrusieŭ.
«My z aptymizmam sustreli adkaz harvykankama pra niemetazhodnaść budaŭnictva damoŭ unutry našaha dvara. Hety prykład demanstruje, što haradskaja ŭłada prysłuchoŭvajecca da mierkavańnia žycharoŭ Minska. Inicyjatyŭnaja hrupa raźličvaje na dalejšy dyjałoh z haradskoj uładaj, pakolki žychary kvartała, jakija ŭpaŭnavažyli jaje na toje, patrabujuć nie časovaha, a pastajannaha rašeńnia, što datyčycca losu ziemlaŭ i pabudoŭ, raźmieščanych u dvary kvartała», — prakamientavaŭ pradstaŭnik inicyjatyŭnaj hrupy Dźmitryj Bałaš.
Na jaho dumku, kali nie razhledzieć situacyju ŭ kompleksie i nie vyznačycca z pryznačeńniem ziamli, zaniataj starymi haražami, inviestar vyčakaje čas i vierniecca ŭ dvor iznoŭ, historyja sa sprobaj uščylnieńnia paŭtorycca. «Žychary patrabujuć takoha rašeńnia, jakoje pojdzie na karyść im, dziaržavie, haradskomu, hramadskamu i ekaasiarodździu, nie budzie supiarečyć horadabudaŭničym i inšym narmatyŭna-pravavym aktam, vyrašyć los starych haražoŭ», — skazaŭ aktyvist.
