Sumiesny prajekt «Global Reload», zadumany kampanijaj «Budźma biełarusami!» i partałam Tuzin.fm, papoŭniŭsia novaj pieśniaj. Rok-zorka ŭkrainskaj paezii Siarhiej Žadan i charkaŭski ska-pank hurt «Sobaki v kosmosi» pieraasensavali pa-ŭkrainsku pieśniu hurta «Mroja».
Muzyki vybrali znakamituju pieśniu «Rok-muzykant» aŭtarstva Lavona Volskaha i Ŭładzimira Davydoŭskaha. «Ja paprasiŭ kalehaŭ pa hurcie vybrać štości, što im spadabajecca z tvorčaści «Mroi». Bo «Mroju», N.R.M. dy inšyja prajekty Volskaha ja słuchaju i lublu daŭno. Nie chacieŭ ničoha naviazvać, a chłopcy vybrali voś takuju pieśniu, jakuju zachacieli zrabić pa-svojmu», – raspaviadaje Siarhiej Žadan, jaki pierakładaŭ vieršy Lavona Volskaha dla antałohii biełaruska-ukrainskaj paezii, a ŭ 2000 hodzie navat zładziŭ kancert biełaruskaha muzyki ŭ Charkavie.
Pieśnia «Rok-muzykant» užo hučyć na vystupach hurta «Sobaki v kosmosi» i vielmi dobra ŭsprymajecca publikaju. Žadan pradstaŭlaje jaje, jak «pieśniu mužčyn, jakija viedajuć, što jany chočuć rabić i majuć, što adkazać na lubyja zakidy datyčna svajoj žyćciovaj pazicyi». Jana ŭvajšła ŭ prahramu «10 praviednikiv», ź jakoj hurt kancertuje sioleta pa Jeŭropie.
Žadan i «Sobaki» praciahnuli prajekt «Global Reload». Jaho sens u tym, kab muzyki z roznych krainaŭ śvietu vykanali pieśni na słovy biełaruskich paetaŭ na svajoj movie. Amierykaniec Karł Fryjersan, vakalist niamieckaj hrupy De Phazz, zaśpiavaŭ pa-anhielsku pieśniu na słovy Anatola Sysa, u vykanańni hurta Karpatt z Paryžu ŭpieršyniu pa-francusku zahučaŭ Uładzimier Karatkievič. A voś lidar «Mašiny vriemieni» Andrej Makarevič vyrašyŭ zaśpiavać svaju pieśniu «Śnieh» pa-biełarusku.
