Upraŭleńniem Śledčaha kamiteta pa Viciebskaj vobłaści rasśledujecca kryminalnaja sprava ŭ dačynieńni da dzieviaci słužbovych asob Miorskaha rajonnaha spažyvieckaha tavarystva.
Jak paviedamlaje aficyjny pradstaŭnik USK pa Viciebskaj vobłaści Ina Harbačova, ustanoŭlena, što słužbovyja asoby, u liku jakich namieśnik staršyni praŭleńnia pa ekanomicy, rabotniki buchhałteryi, kasiry i zahadčyki mahazinaŭ, raspracavali niekalki złačynnych schiem i ciaham troch hadoŭ vykradali biudžetnyja srodki na ahulnuju sumu bolš za 3 miljardy biełaruskich rubloŭ.
Pry hetym udzielniki złačynnaj hrupy vykradali jak hrošy, jakija zachoŭvajucca ŭ kasie, tak i tavarna-materyjalnyja kaštoŭnaści.
Śledstva vyrašyła zaklučyć pad vartu 7 padazravanych asobaŭ. Rasśledavańnie kryminalnaj spravy, raspačataj pa č.4 art.210 (kradziež šlacham złoŭžyvańnia słužbovymi paŭnamoctvami, ździejśnieny ŭ asabliva bujnym pamiery) KK RB, praciahvajecca, detalova vyśviatlajucca abstaviny zdareńnia, ustaloŭvajecca rola kožnaha ŭdzielnika złačynnaj hrupy.