Ukrainskaha režysiora Aleha Siancova i aktyvista Alaksandra Kolčanku, asudžanych u Rasii, prapanoŭvali abmianiać na rasijanaŭ Alaksandra Alaksandrava i Jaŭhiena Jerafiejeva. Pra heta ŭ subotu ŭ efiry «Hramadskaha na ruskaj» raspavioŭ kiraŭnik ukrainskaha Centra vyzvaleńnia pałonnych «Aficerski korpus» Uładzimir Ruban.
Aleh Siancoŭ, tass.ru
Pa słovach Rubana, inicyjatyva sychodziła mienavita ad pierahavorščykaŭ z Rasii, a nie z samaabvieščanych respublik. Pieramovy, pa jaho słovach, byli nieaficyjnymi i prachodzili ŭ Minsku na minułym tydni.
«Ja nie nazavu krynicu, nie nazavu bok, ź jakim my abmiarkoŭvali. Pa ich prośbie. Heta pradstaŭniki Rasii, a nie Daniecka. Sustreča była ŭ Minsku. Razmova była dastatkova surjoznaj», — raspavioŭ Ruban.
***
U kancy žniŭnia Paŭnočna-Kaŭkazski akruhovy vajskovy sud prysudziŭ ukrainskaha režysiora Aleha Siancova da 20 hadoŭ strohaha režymu, Alaksandru Kolčanku dali dziesiać hadoŭ strohaha režymu. Śledstva ličyć, što Aleh Siancoŭ razam z saŭdzielnikami sprabavaŭ zładzić terakty ŭ Krymie paśla dałučeńnia paŭvostrava da Rasii.
Siaržant Alaksandr Alaksandraŭ i kapitan Jaŭhien Jerafiejeŭ byli zatrymanyja paśla pierastrełki z ukrainskimi vajskoŭcami kala horada Ščaście ŭ Łuhanskaj vobłaści Ukrainy 16 maja. Na dopycie jany nazvali siabie dziejučymi vajskoŭcami 3-j asobnaj hvardziejskaj bryhady śpiecnazu ŭ Taljaci. Rasijski bok nazyvaje ich byłymi vajskoŭcami.