U žniŭni nasielnictva rezka pavialičyła čystuju kuplu zamiežnaj valuty. Pavodle danych Nacbanka, za apošni miesiac leta fizičnyja asoby kupili zamiežnaj valuty na 334,1 młn. dołaraŭ bolš, čym pradali.
Varta adznačyć, što amal usie papiarednija miesiacy ŭ hetym hodzie nasielnictva vystupała ŭ roli čystaha pradaŭca zamiežnaj valuty. Tak, kali ŭ studzieni fizasobami kuplena zamiežnaj valuty na čystaj asnovie na 30,2 młn. dołaraŭ u ekvivalencie, to ź lutaha situacyja pamianiałasia. U lutym nasielnictva kupiła zamiežnaj valuty bolš, čym pradało, na 55,6 młn. dołaraŭ, u sakaviku — na 255,3 młn. dołaraŭ, u krasaviku — na 249,6 młn. dołaraŭ, u mai — na 150,8 młn. dołaraŭ.
U červieni—lipieni abjom čystaha prodažu nasielnictvam zamiežnaj valuty źniziŭsia da minimumu (8,15 młn. i 7,65 młn. dołaraŭ adpaviedna). Adnak u žniŭni situacyja na valutnym rynku rezka źmianiłasia — nasielnictva, jak i ŭ pačatku hoda, stała kuplać zamiežnaj valuty značna bolš, čym pradavać. Pavodle danych Nacbanka, u apošni letni miesiac fizasoby kupili valuty na 970,5 młn. dołaraŭ, pradali — na 636,4 młn. dołaraŭ.
Kamiercyjnyja banki ŭ žniŭni kanstatavali pavyšany popyt nasielnictva na zamiežnuju valutu. U pryvatnaści, «Biełarusbank» 25 žniŭnia paviedamiŭ, što popyt na zamiežnuju valutu z boku nasielnictva vyras u piać razoŭ.
Ekśpierty finansavaha rynku tłumačać pavieličeńnie popytu na zamiežnuju valutu ŭ žniŭni rostam devalvacyjnych čakańniaŭ, vyklikanych asłableńniem nacyjanalnaj valuty hałoŭnaha handlovaha partniora Biełarusi — Rasii.
U treciaj dekadzie žniŭnia valutny kurs u Rasii dasiahnuŭ 70 rasijski rubloŭ za dołar. Na hetym fonie kurs dołara ŭ Biełarusi pieraadoleŭ adznaku ŭ 17 tys. 800 rubloŭ. U nastupnyja dni pa miery stabilizacyi situacyi ŭ Rasii aficyjny kurs dołara ŭ Biełarusi stabilizavaŭsia i pa stanie na ranicu 9 vieraśnia skłaŭ 17 tys. 816 rubloŭ.
