Eks-hubiernatar Dnieprapiatroŭskaj vobłaści Ihar Kałamojski paraŭnaŭ hubiernatara Adeskaj vobłaści Michaiła Saakašvili z «sabakam, jaki kusaje». Takim čynam jon adkazaŭ na zajavy Saakašvili pra ŭpłyŭ aliharcha na pasažyrskija avijapieravozki va Ukrainie.
«Kali sabaka biez namordnika kahości kusaje, treba karać i sabaku, i, što važna, jaje haspadara. Sabak u takich vypadkach usyplajuć. A ŭ našym vypadku možna adpravić nakładzienym płaciažom u Hruziju, kab jon adkazaŭ za pakusanych tam ludziej», — zajaviŭ Kałamojski ŭ efiry padkantrolnaha jamu telekanała TSN.
«Što tyčycca haspadara, my razumiejem, chto jon», — dadaŭ biźniesmien.
Na dumku Kałamojskaha, kiraŭnik rehijonu pavinien adkazać za svaje słovy hrašyma. Jon namiaknuŭ, što hatovy «sustrakacca ź im u sudach, adstojvać svoj honar i hodnaść tam, atrymlivać materyjalnuju kampiensacyju». «Saakašvili zajaŭlaŭ, što ŭ jaho zarpłata dźvieście tysiač dalaraŭ — chaj ź jaje płacić», - dadaŭ Kałamojski.
Saakašvili ŭ intervju ŭkrainskamu «5 kanału» zajaviŭ, što ŭrad Ukrainy kantralujuć aliharchi. Pavodle jaho słoŭ, premjer-ministr Arsień Jacaniuk admoviŭsia razhledzieć dakład ab košcie avijapieralotaŭ i dziejnaści kiraŭnika Dziaržavijasłužby Dzianisa Antaniuka (jon byŭ adchileny paśla karupcyjnaha skandału, ale ŭžo viarnuŭsia na pasadu), bo prymaje rašeńni na karyść aliharchaŭ, naprykład, Kałamojskaha i Rynata Achmietava.
