Siomy tradycyjny fiestyval «Kamianica» projdzie pad Minskam 5 vieraśnia. «Naša Niva» sabrała niekalki karysnych faktaŭ dla tych, chto źbirajecca na fest albo jašče dumaje, ci kupić kvitki.
Jak dabracca
Skrynšot Google Maps
Jechać treba da Muzieju narodnaj architektury ŭ Stročycach, što ŭ 4 km ad MKADa. Dla aŭtamabilistaŭ jość biaspłatnaja parkoŭka kala ŭvachodu ŭ muziej. Pobač z druhoj scenaj budzie viełaparkoŭka.
Z 11:30 da 23:00 ad mietro «Malinaŭka» ŭ abodva baki raz na 15 chvilin budzie chadzić biaspłatny aŭtobus. Budźcie ŭvažlivyja: pa zaviaršeńni festu źjechać zachoča adnačasova značna bolš ludziej, čym vy sustreniecie pa darozie tudy!
Akramia taho, dabracca ad aŭtastancyi «Paŭdniova-Zachodniaja» (taksama kala mietro «Malinaŭka») možna na pryharadnym aŭtobusie 203e. Kvitok kaštuje 9200 rubloŭ. Raskład možna spytać pa numary 114 albo na sajcie ticketbus.by, abraŭšy ŭ jakaści kancavoha punktu «MUZIEJ NAR.ARCH.BYTA».
Jakoje nadvorje abiacajuć
Skrynšot Meteocast.net
Chutčej za ŭsio, daždžu nie budzie, ale parason na ŭsialaki vypadak zachapić varta. Udzień budzie pachmurna, da +18..+20. Abyścisia možna i kašulaj, ale na viečar (kali moža być i +13) lepiej zachapić ciopłuju bajku ci kurtku.
Ci prapuściać z termasam z harbataj, nieviadoma: na terytoryju zabaraniajecca pranosić luboje charčavańnie akramia dziciačaha i vadu ŭ šklanych butelkach. Ci źličać termas za adno z hetaha, zaležyć ad milicyi, jakaja budzie dahladać naviednikaŭ na ŭvachodzie.
Chto i kali vystupić
Fiestyval u 12:00 adkryjuć dziciačyja kalektyvy «FołkRada» dy «Miłavica». Paśla ich na hałoŭnuju scenu vyjduć Altanka dy «Stary Olsa». Ciaham dnia na vialikaj scenie vystupiać «Drimba da Dziha» (Ukraina), Trad Attack! (Estonija), Dzikie Jablka (Polšča) i biełaruskija hurty Vuraj i «Jahorava hara». Na druhoj scenie zhrajuć «Varhan», «Haryń», «Miareža», «Strała», «Etna-supołka» dy inšyja.
Dakładny raskład vystupaŭ nieviadomy, jaho abiacajuć abviaścić ranicaj u dzień festu praz supołki ŭ Facebook i VK. Vystupy zavieršacca a 10-j viečara.
Što budzie akramia muzyki
Na «Kamianicy-2014». Fota: Julija Balcevič
Lidar «Troicy» Ivan Kirčuk u carkvie kala karčmy prezientuje etnahrafičnuju misteryju — monaśpiektakl «Spoviedź pad strechami». Prezientuje trojčy: a 13, 15 i 16 hadzinach. «Ja pakažu toje, što kaliści adbyvałasia ŭ damach, jakija stajać na terytoryi muzieju narodnaj architektury i pobytu. U ich stahodździami žyli ludzi. Biez telebačańnia, haziet i radyjo, biez elektryčnaści, — abiacaje Kirčuk. — Heta było ciažkaje žyćcio, sialanie vielmi šmat pracavali, ale jany taksama mieli svaje radaści i zabavy, pra jakija bolšaść z nas zaraz ničoha nie viedaje».
Na tradycyjnym kirmašy svaje raboty pradstaviać paŭsotni ramieśnikaŭ. U ich liku hančary i kavali, vytvorcy lalek, upryhožvańniaŭ z naturalnych materyjałaŭ i narodnaj adziežy — ad tradycyjnych vyrabaŭ da sučasnych vyšymajek.
Abiacajuć i inšyja zabavy: narodnyja tancy i hulni, rycary i arbaletnaje strelbišča, dziciačaja placoŭka z malavańniem i placieńniem. Možna budzie paskakać na kani, palatać na aŭtažyry ci prosta pavalacca ŭ sienie.
Jak prajści biaspłatna
Treba voś tak. Palić nie abaviazkova (i naohuł nie varta). Fota: Siarhiej Hudzilin
Nacyjanalny stroj — u im u muziej prapuściać zadarma. Ale prostaja vyšymajka nie projdzie: treba mieć poŭny stroj, ad abutku da hałaŭnoha ŭboru. Kali što, jość śpis kram, dzie možna kupić vyšyvanku. Albo možna być dziciom da 12 hod — ich taksama prapuściać biaspłatna.
U inšych vypadkach daviadziecca zapłacić 100 tysiač za darosły kvitok i 50 za dziciačy. Ich buduć pradavać jak u kasach muzieju, taksama kvitki ŭžo možna nabyć na bycard.by (nie zabudźcie ich razdrukavać).
