Prezident Ukrainy Piatro Parašenka zajaviŭ, što kančatkovaje rašeńnie adnosna źmianieńniaŭ u Kanstytucyju budzie zaležać ad situacyi na Danbasie i vykanańnia Rasijaj Minskich pahadnieńniaŭ.
Pra heta jon skazaŭ u svaim videazvarocie ŭ paniadziełak viečaram.
«Ukraina siońnia paćvierdziła svaju reputacyju nadziejnaha partniora, uzmacniła imidž krainy, jakaja vykonvaje ŭziatyja na siabie abaviazacielstvy. I vykonvaje Minskija pahadnieńni, u adroźnieńnie ad Rasii», — prakamientavaŭ Parašenka hałasavańnie ŭ Radzie adnosna źmianieńniaŭ u Kanstytucyju ŭ častcy decentralizacyi.
«Kali Maskva nie adumajecca, buduć praciahnutyja piersanalnyja sankcyi suprać asob, jakija majuć dačynieńnie da anšlusu Kryma i akupacyi Danbasa, a ŭ pačatku nastupnaha hoda — i siektaralnyja ekanamičnyja sankcyi», — zajaviŭ jon.
«Siońniašniaje hałasavańnie nie kančatkovaje, ale jano daść vielizarnaje pole dla manieŭru ŭkrainskaj dypłamatyi. A kančatkovaje rašeńnie ŭ kancy hoda, kali treba budzie 300 hałasoŭ, zapeŭnivaju vas, budzie zaležać ad taho, jak na praciahu hetych niekalkich miesiacaŭ budzie raźvivacca situacyja na Danbasie, i nakolki Rasija budzie vykonvać Minskija pahadnieńni», — dadaŭ Parašenka.
«Prajekt źmianieńniaŭ u Kanstytucyju nie praduhledžvaje asablivaha statusu dla Danbasa. Heta, na maju dumku, tolki kliše, jakoje dla peŭnych palityčnych siłaŭ stała pieradvybarnaj technałohijaj, elemientam čornaha pijaru suprać źmienaŭ u Kanstytucyju, suprać prezidenta», — adznačyŭ jon.
«Bolš za toje, my prybirajem ź dziejučaj Kanstytucyi artykuł 92, jaki praduhledžvaje tearetyčnuju mahčymaść abviaščeńnia śpiecyjalnaha statusu dla asobnych haradoŭ — kab nie było navat najmienšaj jurydyčnaj začepki dla paradu suvierenitetaŭ», — dadaŭ kiraŭnik dziaržavy.
«Što tyčycca śpiecyfičnaha paradku ažyćciaŭleńnia miascovaha samakiravańnia ŭ asobnych rajonach Danieckaj i Łuhanskaj abłaściej, to jon vyznačajecca asobnym zakonam, jaki ŭžo dvojčy prymaŭsia Viarchoŭnaj Radaj — papiaredniaha i hetaha sklikańnia. I termin jaho pravamocnaści — try hady, ź jakich adzin užo amal prajšoŭ», — skazaŭ prezident.
«Bolšaja častka artykułaŭ hetaha zakona pakul prypynienaja, i jany mohuć zarabić tolki paśla praviadzieńnia na hetych terytoryjach vybaraŭ u adpaviednaści z ukrainskim zakanadaŭstvam i standartami ABSIE. I tolki paśla vyvadu z ukrainskaj terytoryi rasijskich vojskaŭ, paśla vyvadu zbroi, paśla adnaŭleńnia kantrolu nad usim miažoj z RF», — dadaŭ jon.
«Źmieny ŭ Kanstytucyju značać nie stratu terytoryi, a naadvarot dajuć šaniec i pierśpiektyvu palityka-dypłamatyčnym šlacham viarnuć pad suvierenitet Ukrainy akupavanyja terytoryi», — skazaŭ Parašenka.
