Partyja BNF na adnym z najbližejšych pasiadžeńniaŭ sojma, jakija prachodziać raz na miesiac, moža razhledzieć pytańnie ab vychadzie ź inicyjatyvy «Narodny refierendum». Ab hetym BiełaPAN zajaviŭ staršynia arhanizacyi Alaksiej Janukievič.
Fota BYMEDIA.NET
«Čatyry arhanizacyi, jakija zasnavali «Narodny refierendum», na siońnia majuć absalutna roznyja padychody nie tolki da palityčnaj kampanii (prezidenckich vybaraŭ 2015 hoda), ale i šyrej — adnosna pracesaŭ, jakija iduć u krainie, — zajaviŭ Janukievič. —
Vidavočna, što ŭ hetych struktur roznaje bačańnie form i mietadaŭ dziejnaści, jakija źjaŭlajucca bolš efiektyŭnymi. I samaje hałoŭnaje — stračany piersanalny davier pamiž lidarami arhanizacyj, jakija dva papiarednija hady pracavali ŭ miežach «Narodnaha refierendumu».
Palityk adznačyŭ, što «farmalna «Narodny refierendum» praciahvaje isnavać». «Dumaju, paśla vybarčaj kampanii my sustreniemsia, pahavorym, možam i ci chočam my štości rabić razam, ci pavinna inicyjatyva transfarmavacca ŭ štości inšaje, ci pavinien źmianicca skład udzielnikaŭ», — skazaŭ jon.
«Ale vidavočna, što ŭ ciapierašnim vyhladzie i na płatformie, na jakoj isnavaŭ «Narodny refierendum», supracoŭnictva praciahvacca nie budzie», — padkreśliŭ Janukievič.
U kaalicyju «Narodny refierendum» uvachodziać kampanija «Havary praŭdu», Partyja BNF, ruch «Za Svabodu» i Biełaruskaja sacyjał-demakratyčnaja partyja (Hramada).
Hałoŭnaja ideja inicyjatyvy — vynieści na ŭsienarodnaje abmierkavańnie šeść klučavych pytańniaŭ, jakija datyčacca raźvićcia biełaruskaj dziaržavy i hramadstva.
29 žniŭnia na pasiadžeńni sojma Partyi BNF Janukievič zajaviŭ, što inicyjatyva «Narodny refierendum» znachodzicca faktyčna ŭ stanie komy.
«Usie, chto sočyć za infarmacyjnym polem, bačyć, što budučyni ŭ inicyjatyvy «Narodny refierendum» niama. Siońnia hety prajekt faktyčna znachodzicca ŭ stanie komy. Dumaju, heta moža być kanstatavana najbližejšym časam», — skazaŭ jon.
29 žniŭnia sojm Partyi BNF taksama pryniaŭ rašeńnie ab admovie ŭ dalejšaj padtrymcy na vybarach aktyvistki kampanii «Havary praŭdu» Taćciany Karatkievič.
