Eks-kandydat u prezydenty Uładzimir Niaklajeŭ ličyć, što ciapier adbyvajecca sproba ŭłady pastavić pad kantrol usiu demakratyčnuju apazycyju. Pra heta jon zajaviŭ na supolnaj pres-kanferencyi ź Mikałajem Statkievičam, Anatolem Labiedźkam i Paŭłam Sieviaryncam.
fota Siarhieja Hudzilina
Uładzimier Niaklajeŭ zajaviŭ, što jon damahaŭsia vyłučeńnia adzinaha kandydata ad apazycyi, kab hety kandydat mieŭ mahčymaść na apošnim etapie prezydenckaj kampanii publična źniacca z vybaraŭ:
«Ułada ŭsio zrabiła, kab nia tolki ja nia staŭ adzinym kandydatam ci Statkievič, a naahuł kab nie było adzinaha kandydata. Ciapier ja nie mahu nie čytać toje, što adbyvajecca ŭ apazycyi: ad pačatku da kanca heta taki soram! Ale jość u nas kandydat ad demakratyčnaj apazycyi, i naša zadača ŭsio ž taki — nie pakidać hetaha kandydata režymu, pasprabavać pieraciahnuć jaho ŭ lahier demakratyčnaj apazycyi, kab hety kandydat zrabiŭ toje, pra što ja skazaŭ, — źniaŭsia z hetych vybaraŭ. I tady heta budzie samy mocny chod, jaki tolki moža być. Tady jana vyratoŭvaje apazycyju, vyciahvaje z hetaha łajna, u jaki jana sama siabie zaciahvaje. Viadoma, nia tolki sama pa sabie, ale i z dapamohaj tych, chto zajmajecca ŭ specsłužbach hetymi spravami. Jany vyrašyli apuścić apazycyju na samaje dno», — zajaviŭ palityk.
«Ale ž faktyčna heta vašy byłyja paplečniki…» — zaŭvažyli, u svaju čarhu, žurnalisty na pres-kanferencyi.
«Słuchajcie, u mianie byłaja žonka, u mianie byłyja braty, byłyja siabry, byłyja paplečniki… Jość toje, što jość. Mianie paprakajuć, čamu ja nie zrabiŭ usio, što možna zrabić, nie zmahaŭsia z byłymi paplečnikami, ź Dźmitryjevym, z tymi, chto absieŭ siońnia «Havary praŭdu». Ale što ja, adzin čałaviek, mahu zrabić suprać specsłužbaŭ? Ja moh zrabić tolki toje, što moh zrabić — syści», — adkazaŭ na heta Niaklajeŭ.
Niaklajeŭ padkreśliŭ, što asabista vielmi dobra stavicca da Taciany Karatkievič.
Palityk paviedamiŭ, što navat u svoj čas prapanoŭvaŭ jaje vyłučyć kandydatam na Kanhres demakratyčnych siłaŭ, dzie jana, chutčej za ŭsio, prajhrała b, ale nabrała by peŭnaj palityčnaj vahi i ciapier była b u značna lepšaj sytuacyi.
«Pryčyna majho vychadu z kampanii «Havary praŭdu» nia maje nazvy «Taciana Karatkievič», — padkreśliŭ palityk. — Ja jak da jaje staviŭsia asabista vielmi pryjazna, tak ničoha tut i nie źmianiłasia. Voś my napadajem na jaje — Karatkievič podpisy zdała, Karatkievič toje, Karatkievič heta… Nie Karatkievič heta! Jana nia jość spraktykavany palityk, jana nia jość čałaviek, jaki zdolny praanalizavać palityčnyja hłybini. Joj nahavaryli: Tania, małajčynka, voś hladzi, ty zmožaš zrabić toje i toje, možaš zrabić sacyjalnyja prajekty… Jana słuchaje, i zdajecca, što heta adpaviadaje tamu, što jana chacieła zrabić».
«A hetaja hulnia z podpisami naŭmysna prydumana, kab naahuł adciahnuć uvahu ad hałoŭnaj prablemy — ad taho, što adbyvajecca sproba režymu pastavić pad kantrol usiu demakratyčnuju apazycyju.
A Jarmošyna? Kali takoje było, kab pradstaŭnica ŭłady takoha ŭzroŭniu kinułasia baranić apazycyjnaha kandydata?» — dadaŭ Niaklajeŭ.
